धरणगाव (प्रतिनिधी) पालकमंत्री ना. गुलाबराव पाटील आणि स्थानिक राष्ट्रवादीच्या पदाधिकाऱ्यांमध्ये नुकतीच बंदद्वार चर्चा झाल्याची माहिती समोर आली आहे. दरम्यान, या बैठकीत अनेक महत्वपूर्ण विषयांवर चर्चा झाल्याचे कळते.
काही दिवसांपूर्वी एका कार्यक्रमानिमित्त पालकमंत्री ना. गुलाबराव पाटील हे धरणगावला आले होते. कार्यक्रमस्थळी शिवसेनेचे सहसंपर्क प्रमुख गुलाबराव वाघ, राष्ट्रवादीचे स्थानिक पदाधिकाऱ्यांपैकी माजी नगराध्यक्ष ज्ञानेश्वर महाजन, जिल्हाउपाध्यक्ष दीपक वाघमारे, रवींद्र पाटील, एन.डी.पाटील, डॉ. विलास पाटील हे उपस्थित होते. कार्यक्रमस्थळी असलेल्या एका कार्यालयाच्या खोलीत या सर्वांमध्ये साधारण १० ते १५ मिनिट चर्चा झाल्याचे कळते. या चर्चेत शासकीय कमेटी, विविध विकास कामांबाबत चर्चा झाल्याचे कळते. यावेळी पालकमंत्र्यांनी राष्ट्रवादीच्या पदाधिकाऱ्यांना हक्काने कामे सांगा. कामे निश्चित होतील, असे आश्वासन दिले. एवढेच नव्हे तर आपण महिन्यातून एकदा एकत्र बसत चर्चा करत जाऊ, असे पालकमंत्र्यांनी सांगितल्याचे कळते. अर्थात या बैठकीतील संपूर्ण तपशील कळू शकला नसला तरी महाविकास आघाडी म्हणून ना. पाटील यांची राष्ट्रवादीच्या पदाधिकाऱ्यांसोबत झालेली बंदद्वार चर्चा महत्वपूर्ण मानली जात आहे.
