जळगाव (प्रतिनिधी) जळगावातील एका विश्रामगृहात अल्पवयीन मुलीवर कथित अत्याचाराच्या चर्चेतला आज सकाळपासून पुन्हा उधाण आले होते. त्यानुसार दिवसभरात अनेक चर्चा रंगल्या तसेच काही महत्त्वपूर्ण घडामोडी देखील घडल्या.
जळगाव कथित रेस्टहाऊस कांड प्रकरणात सर्वात मोठी घडामोड म्हणजे सायंकाळी राष्ट्रवादीच्या वतीने चौकशीसाठी दिलेले निवेदन ठरले. त्याच पद्धतीने जिल्ह्यातील एका बड्या नेत्याने नाशिक पोलीस महानिरीक्षक यांना फोन करून या घटनेबाबत चर्चा केल्याचे देखील कळते. तसेच आमदार मंगेश चव्हाण यांनी देखील पोलीस अधीक्षकांकडे चौकशी करण्याची मागणी केली. या तीन प्रमुख घडामोडीमुळे आज चर्चेचा बाजार पुन्हा प्रचंड गरम होता.
शहरातील एका शासकीय विश्रामगृहामध्ये एका अल्पवयीन मुलीवर सामूहिक अत्याचार झाल्याची जोरदार चर्चा काल सकाळपासून सुरू आहे. दरम्यान याबाबत अधिकृत कोणतीही माहिती मिळाली नसल्यामुळे ही घटना खरी की, अफवा? याबाबत अद्यापही खुलासा होऊ शकलेला नाहीय.
जळगावात पसरलेल्या चर्चेनुसार एका शासकीय रेस्ट हाऊसमध्ये (शनिवार) मध्यरात्री एक वासनाकांड घडल्याची वार्ता पसरली. परंतु रात्री उशिरापर्यंत याबाबत अधिकृत कुठलीही माहिती उपलब्ध होऊ शकली नाही. दुसरीकडे सकाळपासून सुरु असलेल्या चर्चा वजा अफवेनुसार एका अल्पवयीन मुलीवर सामूहिक अत्याचार झाला. त्यानंतर पीडित तरुणीची प्रकृती अती रक्तस्त्रावामुळे गंभीर झाली. शहरात तिच्यावर प्राथमिक उपचार झाल्यानंतर तिला पुणे आणि नंतर मुंबईला नेल्याची देखील चर्चा सुरू होती.
तर या अत्याचारात दोन बडे राजकीय नेते सहभागी असल्याची चर्चा होती. एवढेच नव्हे तर, काही जणांनी या घटनेचे थेट चाळीसगाव कनेक्शन देखील जोडण्याचा प्रयत्न केला. परंतु याबाबत अधिकृत कुठलीही माहिती अद्यापही समोर आलेली नाहीये.
दुसरीकडे जळगावातील एका बड्या नेत्याने आज नाशिक पोलीस महानिरीक्षक यांच्यासोबत सोबत या कथित घटनेबाबत चर्चा केली असल्याचे कळते. एवढेच नव्हे तर आयजींचे एक विशेष पथक जळगावात या घटनेची सत्यता तपासत असल्याची देखील चर्चा आहे. परंतु अद्यापपर्यंत याबाबतही कुठूनही ठोस माहिती मिळू शकलेली नाहीये. याबाबत कालप्रमाणे वेगवेगळ्या चर्चा वजा अफवा सकाळपासून सायंकाळपर्यंत सुरूच होत्या. दुसरीकडे या प्रकरणात सोशल मीडियाच्या माध्यमातून ज्या लोकप्रतिनिधींच्या नावाचे चर्चा करण्यात आली ते संबंधित लोकप्रतिनिधी पोलिसांकडे तक्रार करणार असल्याचेही कळते.
सखोल चौकशी करण्याची राष्ट्रवादीची मागणी !
शहरातील विश्रामगृहात कथित अत्याचाराची सखोल चौकशी करून दोषींवर कारवाई करावी,अशी मागणी आज राष्ट्रवादीने जिल्हाधिकारी आणि पोलीस अधिक्षकांना दिलेल्या निवेदनाद्वारे केली. यावेळी राष्ट्रवादीचे जिल्हाध्यक्ष रवींद्र भैय्या पाटील व महिला जिल्हाध्यक्षा वंदनाताई चौधरी यांच्यासह आदी पदाधिकारी उपस्थित होते. दरम्यान, राष्ट्रवादीने केलेल्या मागणीमुळे या प्रकरणात आता राजकीय आरोप-प्रत्यारोप होण्याची देखील दाट शक्यता वर्तविण्यात येत आहे.
चौकशी करा ; भाजपचेही निवेदन
शहरातील विश्रामगृहात काही राजकीय व्यक्तींकडून एका तरुणीवर अमानुष अत्याचार झाल्याची पोस्ट समाज माध्यमांमध्ये व्हायरल होत आहे . याची चौकशी करून दोषींवर कारवाई करा अशी मागणी आज भाजपचे चाळीसगावचे आमदार मंगेश चव्हाण यांनी देखील जिल्हा पोलीस अधीक्षकांना दिलेल्या निवेदनात केली आहे. यावेळी खासदार उमेश पाटील यांच्यासह आदी पदाधिकारी देखील उपस्थित होते.
