मुंबई (वृत्तसंस्था) राज्याचे मुख्यमंत्री एकनाथ शिंदे यांच्याकडून शिवसेनेच्या नवीन पदांची नियुक्ती जाहीर करण्यात आली आहे. यानुसार शिवसेना उपनेते गुलाबराव पाटील यांच्या खांद्यावर प्रवक्तेपदाची महत्वपूर्ण जबाबदारी टाकण्यात आली आहे.
मुख्यमंत्री एकनाथ शिंदे यांच्या हस्ते ही नियुक्तीपत्रे देण्यात आली आहेत. कामगार नेते किरण पावसकर यांची शिवसेनेच्या सचिवपदी नियुक्ती करण्यात आली आहे. तर ठाण्याचे माजी महापौर संजय मोरे यांची शिंदे यांनी सचिव पदावर नियुक्ती केली आहे. याआधी जाहीर केल्याप्रमाणे आमदार दीपक केसरकर हेच पक्षाचे मुख्य प्रवक्ते म्हणून कायम राहणार आहेत. याशिवाय शिवसेनेचे उपनेते गुलाबराव पाटील, आमदार उदय सामंत, किरण पावसकर आणि दहिसरच्या माजी नगरसेविका शीतल म्हात्रे यांची प्रवक्तेपदी निवड करण्यात आलेली आहे. याचबरोबर अंबरनाथचे आमदार डॉ. बालाजी किणीकर यांची पक्षाच्या खजिनदारपदी नियुक्ती करण्यात आली आहे. मुख्यमंत्री एकनाथ शिंदे यांच्याहस्ते ही नियुक्तीपत्रे किरण पावसकर आणि संजय मोरे याना देण्यात आली. तर उर्वरित नेत्यांना देखील ती लवकरच देण्यात येणार आहेत.
दरम्यान, मुख्यमंत्री एकनाथ शिंदे आणि देवेंद्र फडणवीस सरकारच्या मंत्रिमंडळ विस्ताराचा खोळंबा झाला आहे. मंत्रिमंडळाचा विस्तार कधी होणार?, याबाबत अजूनही कोणतीच ठोस माहिती समोर येत नाहीय. असं असताना मुख्यमंत्री एकनाथ शिंदे यांनी आपल्या गटातून नवीन पदांसाठी नियुक्त्या जाहीर केल्या आहेत. यामध्ये अनेक नेत्यांची वर्णी लागली आहे. परंतू या नियुक्त्यांमुळे मात्र, आता नवा वाद निर्माण होण्याची शक्यता आहे.
