बोदवड (प्रतिनिधी) बोदवड-भुसावळ रस्त्यावर बोदवड साळशिंगी दरम्यान असलेल्या छोट्या पुलाजवळ निलगायच्या धडकेने एक दुचाकीस्वार ठार तर दोन जण जखमी झाले. हा अपघातात सोमवार ६ रोजी सकाळी आठ वाजेसुमारास झाला.
बोदवड येथील अमर डेअरीत काम करत असलेले हरिश्चंद्र किसन चाकर (वय ३२,रा .खडका) हे सकाळी कामावर येत असतांना साळशिंगी बोदवड दरम्यानच्या छोट्या पुलाजवळ त्यांच्या दुचाकी (एमएच १९ डीएन ८८४७) ने जात होते. याचवेळी दुचाकीस शेतातून रस्ता ओलांडून वेगाने पळत जाणाऱ्या निलगायीने धडक दिली व ते खाली पडले. त्याचवेळी जवळून (एमएच १९ इएफ ४५८२) या दुचाकीने भुसावळकडे जाणारे प्रमोद नामदेवराव पाडर व रितीक मनोज पाटील (रा बोदवड) यांच्या दुचाकीवर घसरून धडकली. त्यामुळे खाली पडून डोक्यास जबर मार बसल्याने हरिश्चंद्र यांचा जागीच मृत्यू झाला. तर प्रमोद पाडर व रितीक पाटील हे दोन्ही गंभीर जखमी झाले.
जवळील शेतातील उखर्डू महाजन, सुनील दांडगे यांनी बोदवड येथे संपर्क साधून अपघाताची माहिती परिचितांना दिली. पाडर व पाटील या दोघांना बोदवड ग्रामीण रुग्णालयात प्राथमिक उपचार केल्यानंतर भुसावळ येथे खाजगी रुग्णालयात दाखल करण्यात आले. तर मयत हरिश्चंद्र याचे शवविच्छेदन करून प्रेत नातेवाईकाच्या ताब्यात देण्यात आले.
मयताच्या पश्चात वृध्द आई चार वर्षाची मुलगी सहा वर्षाचा मुलगा आहे. या घटनेमुळे तालुक्यात हळहळ व्यक्त होत आहे. याप्रकरणी बोदवड पोलिसात उखर्डू दलपत महाजन यांच्या खबरीवरून या अपघाताची नोंद करण्यात आली असून पुढील तपास हे कॉ सुधाकर शेजोळे हे करीत आहे.
