जळगाव (प्रतिनिधी) धरणगाव, पिंपळे शिवारातील शेतकरी आपल्या परिसरात सुरु होणाऱ्या स्टोन क्रेशरच्या विरोधात जिल्हाधिकारी कार्यालयासमोर उपोषणाला बसले होते. याची दखल घेत आज मंत्री गुलाबराव पाटील हे उपोषणस्थळी पोहोचले. त्यानंतर अपर जिल्हाधिकारी,उपजिल्हाधिकारीही त्वरेने तेथे आले. मंत्र्यांनी तेथूनच धरणगाव तहसीलदारांना फोन लावून स्टोन क्रशर तेथून इतरत्र अकृषक क्षेत्रात स्थलांतरीत करण्याचे आदेश दिले. मंत्री व प्रशासनाने दखल घेतल्याने शेतकऱ्यांनी ना. पाटील यांचे आभार मनात आपले उपोषण मागे घेतले.
धरणगाव पिंपळे शिवार गट क्रमांक 1389/2 हे क्षेत्र काही एरंडोल येथील देविदास महाजन यांनी विकत घेतलेले आहे. त्या जागेवर मनुदेवी स्टोन क्रशर या नावाने परवाना घेऊन स्टोन क्रशरचा व्यवसाय सुरु करणार आहेत. या परिसरातील शेतकरी फळ, भाजीपाला व हंगामी पिकांची शेती करतात. स्टोन क्रशरच्या धुळीमुळे शेतातील पिकांना मोठा धोका आहे. या परिसरातील 60 ते 70 हेक्टर शेती बाधीत होवू शकते.त्यामुळे त्या स्टोन क्रशरचा परवाना रद्द करावा, या मागणीसाठी याेगेश चव्हाण, साहेबराव पाटील, आबा पाटील, गोविंदा माळी, रामा माळी आदी शेतकरी सोमवार पासून आमरण उपोषणाला बसले होते. मुख्यमंत्री एकनाथ शिंदे जळगाव दौऱ्यावर येत असताना मंगळवारी मंत्री गुलाबराव पाटील उपोषणस्थळी आले. त्यांनी शेतकऱ्यांची समजूत काढत थेट आदेश दिल्यामुळे शेतकऱ्यांनी आपले उपोषण मागे घेतले. दरम्यान, स्टोन क्रशरला दिलेल्या परवानगीच्या अनुषंगाने उपजिल्हाधिकारी भारदे या धरणगाव येथे प्रत्यक्ष पाहणी करणार आहेत. त्यानंतर त्या स्टोन क्रशरबाबत निर्णय घेतला जाणार आहे.
तत्कालीन मुख्यमंत्र्यांकडे मागितली होती कुटुंबासह सामुहिक आत्महत्येची परवानगी
शहरातील शेतकऱ्यांचा एक गट मुख्यमंत्री उद्धव ठाकरे यांच्याकडे कुटुंबासह सामुहिक आत्महत्येची परवानगी देण्याची मागणी करत असल्यामुळे जिल्ह्यात प्रचंड खळबळ उडाली आहे. एका स्टोन क्रेशरच्या व्यवसायासाठी पिंपळे शिवारातील ७० हेक्टर सुपीक जमीन नापीक होऊ देऊ नका, अशी आर्तहाकच शेतकऱ्यांनी दिली आहे. संबंधित व्यवसायिकाने नियमांची पायमल्ली केली असून धरणगाव तहसीलदारांनी याकडे मुद्दाम दुर्लक्ष केलेय. कारण त्यांनी संबंधिताकडून चिरीमिरी घेतली असल्याचा गंभीर आरोप देखील शेतकऱ्यांनी केला आहे.
