जळगाव (प्रतिनिधी) शहरातील एका २१ वर्षीय तरुणीच्या नावाचा व फोटोचा वापर करीत बनावट इन्स्टाग्राम खाते तयार करुन आक्षेपार्ह फोटो व्हायरल करण्यात आल्याचा धक्कादायक प्रकार समोर आला. या प्रकरणी सायबर पोलिस ठाण्यात बनावट खाते तयार करणाऱ्याविरुद्ध गुन्हा दाखल करण्यात आला.
शहरातील एका भागातील तरुणीला तिच्या नावाचा व फोटोचा वापर करीत बनावट इन्स्टाग्राम खाते तयार करण्यात आल्याचे लक्षात आले. या खात्यावर तरुणीचा बदनामीकारक मॅसेज तसेच अश्लील प्रकारचे स्टिकर लावून तिचे फोटो इन्स्टाग्रामच्या स्टोरीला ठेवण्यात आले. यातून तिची सोशल मीडियावर बदनामी करीत हे फोटो व्हायरल करण्यात आले. या प्रकरणी तरुणीने सायबर पोलिस ठाण्यात फिर्याद दिली. त्यावरुन बनावट खाते तयार करणाऱ्यावर गुन्हा दाखल करण्यात आला. पुढील तपास पोलिस निरीक्षक लीलाधर कानडे करीत आहेत.
