धरणगाव (प्रतिनिधी) येथील शिवसेना (उद्धव बाळासाहेब ठाकरे) पक्षाच्या वतीने आयोजित जाहीर सभेत मंत्री गुलाबराव पाटील यांच्याविषयी आक्षेपार्ह वक्तव्य करण्यात आले होते. याप्रकरणी युवा सेनेचे महाराष्ट्र प्रचारक शरद कोळी यांच्याविरुद्ध गुरुवारी धरणगाव पोलिसात गुन्हा दाखल करण्यात आला आहे.
शरद कोळी यांना भाषण करण्यास बंदी
शिवसेना (ठाकरे गट) पक्षाच्यावतीने धरणगावात मंगळवारी उपनेत्या सुषमा अंधारे यांची जाहीर सभा झाली. यात बोलताना शरद कोळी यांनी पालकमंत्री गुलाबराव पाटील यांच्या विषयी आक्षेपार्ह विधान केले. यामुळे त्यांच्या समर्थकांमध्ये संतापाची लाट पसरली आहे.दुसरीकडे याबाबत धरणगाव व पाळधी येथील पोलिसांना गुर्जर समाजाच्या वतीने निवेदनही देण्यात आले होते. यात म्हटले आहे होते की, या वक्तव्यामुळे गुर्जर समाजाच्या भावना दुखावल्या गेल्या आहेत. त्यामुळे शरद कोळी यांच्यावर कारवाई करावी. तसेच या प्रकाराविरुद्ध गुज्जर स्नेहवर्धक मंडळ समाजाच्यावतीने जिल्हाभरात आंदोलन छेडण्यात येईल व होणाऱ्या परिणामास प्रशासन जबाबदार असेल, असा इशारा निवेदनात देण्यात आला होता. याबाबतचे निवेदन सपोनि जिभाऊ पाटील यांनी स्वीकारले. यानंतर जिल्हाधिकारी अमन मित्तल यांनी शरद कोळी यांना भाषण करण्यास बंदी घातली. यामुळे आज चोपडा तर उद्या मुक्ताईनगरातील शिवसेनेच्या महाप्रबोधन यात्रेत ते भाषण करू शकणार नसल्याचे स्पष्ट झाले. तर, पोलीस प्रशासनाने याबाबतची नोटीस आज कोळी यांना जारी केली.
हॉटेलमध्ये पोलीस विरुद्ध शिवसेना
नोटीस जारी करतानाच जळगाव एलसीबीचे निरीक्षक किसनराव नजनपाटील हे पथकासह जळगावात ते राहत असलेल्या रेल्वेस्टेशनजवळील हॉटेलमध्ये दाखल झाले. पोलीस ताब्यात घेणार असल्याचे वाटल्याने शिवसेना-उध्दव बाळासाहेब ठाकरे पक्षाच्या पदाधिकार्‍यांनी जोरदार घोषणाबाजी केली. हॉटेलमध्ये पोलीस विरुद्ध शिवसेना असे चित्र उभे राहिले होते. बराच वेळ त्याठिकाणी गोंधळ सुरू होता. अखेर शिवसेनेच्या उपनेत्या सुषमा अंधारे, जिल्हा संपर्क प्रमुख संजय सावंत यांच्यासह सर्व पदाधिकारी पायी चालत शहर पोलीस ठाण्यात पोहचले. सहाय्यक अधीक्षक कुमार चिंथा यांना संजय सावंत यांनी शरद कोळी कोणतेही भाषण करणार नसल्याची ग्वाही दिल्यावर सर्व पदाधिकारी व कार्यकर्ते पुढे मार्गस्थ झाले.
धरणगावात गुन्हा दाखल करण्याचे काम सुरु
दुसरीकडे शिवसैनिक तथा शिंदे गटाचे कार्यालयीन प्रमुख बालू जाधव यांनी दिलेल्या फिर्यादीवरून शरद कोळी यांच्याविरुद्ध गुन्हा दाखल करण्यात आला आहे. बालू जाधव यांनी ‘द क्लिअर न्यूज’ सोबत बोलतांना सांगितले की, आमचे नेते गुलाबराव पाटील यांच्यावर शरद कोळी यांनी अर्वाच्च आणि शिवराळ भाषेत टीका केली होती. यामुळे आमच्या भावना दुखावल्या असून याबाबत मी पोलिसात दुपारीच तक्रार दिली होती. त्यानुसार आता गुन्हा दाखल करण्याचे काम सुरु आहे. दरम्यान, सूत्रांनी दिलेल्या माहिती नुसार कोळी यांच्याविरुद्ध १५३ अ आणि २९५ अन्वये गुन्हा दाखल करण्याची प्रक्रिया सुरु आहे. दरम्यान, शरद कोळी यांच्याविरुद्ध धरणगाव पोलिसात गुन्हा दाखल झाल्यानंतर या गुन्ह्यात त्यांना अटक केली जाण्याची शक्यता वर्तविण्यात येत असून शिवसेना नेत्यांच्या ताफ्यामागे पोलिसांची वाहने देखील रवाना झाली आहेत.
