नवी दिल्ली (वृत्तसंस्था) संसदेवर झालेल्या दहशतवादी हल्ल्याच्या 22 व्या वर्धापनदिनानिमित्त दोन तरुणांनी प्रेक्षक गॅलरीतून अचानक खाली उडी मारल्याने सभागृहात एकच खळबळ उडाली. दरम्यान, घोषणाबाजी करणारा आणि संसदेच्या सभागृहात पिवळा धूर करणाऱ्या तरुणाचं अमोल शिंदे असं नाव असल्याची माहिती समोर आली आहे. अमोल याच्या लातूर जिल्ह्यातील नवकुंडझरी गावात पोलीस आता चौकशीसाठी दाखल झाले आहेत.
लोकसभेचे कामकाज सुरू असताना दोन तरुण प्रेक्षक गॅलरीतून सभागृहात आले आणि त्यांनी टेबलावरुन सभापतींच्या खुर्चीकडे धाव घेण्याचा प्रयत्न केला. यावेळी त्यांनी पिवळ्या रंगाचे स्मोक कँडलही फोडले. यावेळी खासदार हनुमान बेनिवाल, मनोज कोटक, मलूक नागर यांच्यासह काही खासदारांनी त्या आरोपींना पकडले. यावेळी खासदारांनी आरोपीला बेदम चोपही दिला.
याप्रकरणी अटक करण्यात आलेला अमोल धनराज शिंदे हा तरुण महाराष्ट्रातला आहे. अमोल मूळचा लातूरच्या चाकूर तालुक्यातील नवकुंडझरी गावचा राहणारा आहे.. संसदेत दोघा तरुणांनी प्रेक्षक गॅलरीत उडी मारली… तर दोघांनी संसदेच्या आवारात निदर्शनं केली. स्मोक कँडलमधून त्यांनी धूर सोडला. त्यामध्ये अमोलचा समावेश होता. या घटनेनंतर सुरक्षारक्षकांनी अमोल शिंदेला तत्काळ अटक केली. तो दिल्लीला का गेला? तिथे त्याचे नेमके काय काम होते? त्याच्यासोबत कोण – कोण होते? याचा तपास सध्या पोलिस करत आहेत.
याप्रकरणी पोलीस अमोल शिंदेच्या घरी दाखल झाले असून अमोल शिंदेच्या आई-वडिलांची चौकशी सुरू झालीय. लातूर जिल्ह्यातल्या चाकूर तालुक्यातील नवकुंडझरी गावातल्या घरी जाऊन पोलिसांनी कसून चौकशी सुरू केलीय. दरम्यान, अमोल शिंदे हा गेल्या अनेक दिवसांपासून पोलीस भरतीची तयारी करत होता. तो कुटुंबिय आणि गावापासून दूर राहत होता. तो गेल्या 15 दिवसांपूर्वी दिल्लीला जातो असं आई-वडिलांना सांगून निघून गेला होता.
आरोपींमध्ये सागर शर्मा(रा. लखनौ, उत्तर प्रदेश), अमोल शिंदे(रा. लातूर, महाराष्ट्र), नीलम सिंह(रा. हरियाण), मनोरंज गौडा(रा.म्हैसूर, कर्नाटक) यांचा समावेश आहे. त्यांच्यासोबत आणखी कोण कोण होते, याचा शोध घेतला जातोय. दिल्ली पोलीस आणि आयबी आरोपींची चौकशी करत आहे. दरम्यान, खासदार प्रताप सिम्हा यांच्या शिफारशीनं संसदेत गोंधळ घालणाऱ्या तरुणांना पास मिळाले होते. हे खासदार प्रताप सिम्हा कर्नाटकातील म्हैसूरचे खासदार आहेत. त्यांचं वय ४२ वर्षे असून ते भाजपचे खासदार आहेत.
आजच्याच दिवशी 13 डिसेंबर 2001 रोजी संसद भवनावर झालेल्या दहशतवादी हल्ल्याच्या 22 व्या वर्धापन दिनानिमित्त बुधवारी लोकसभेत झालेल्या सुरक्षेतील त्रुटींमुळे अनेक मोठे प्रश्न निर्माण झाले आहेत. याबाबत लोकसभा अध्यक्ष ओम बिर्ला म्हणाले की, आज घडलेली घटना आपल्या सर्वांसाठी चिंतेची बाब असून ही घटना अत्यंत गंभीर आहे. याची उच्चस्तरीय चौकशी सुरू असून त्यानुसार कारवाई केली जाईल. सभागृहातील सुरक्षेबाबतही सविस्तर आढावा घेतला जाणार आहे. त्यामुळे त्यांनी सभागृहाचे कामकाज गुरुवारी सकाळी 11 वाजेपर्यंत तहकूब केले.
