मुंबई (वृत्तसंस्था) राज्यातील आमदारांचा स्थानिक विकास निधी चार कोटी रुपयांवरून पाच कोटी रुपये करण्याचा निर्णय राज्य सरकारकडून घेण्यात आला आहे. उपमुख्यमंत्री अजित पवार यांनी आज घोषणा विधानसभेत केली. एवढेच नव्हे, तर आमदारांचे ड्रायव्हर आणि पीएच्या पगारात पाच हजार रुपयांची वाढ करण्याचा निर्णय देखील घेण्यात आला आहे.
नव्या निर्णयानुसार आता आमदारांना स्थानिक विकासासाठी पाच कोटी रुपये दिले जातील. या निधीतून आमदारांना आपल्या मतदारसंघातील विकासाची कामं करता येणार आहेत. त्यानुसार आमदारांच्या स्थानिक विकास निधीत आणखी एक कोटींची भरघोस वाढ करण्यात आली आहे. विधानसभा आणि विधानपरिषदेतील आमदारांना हा निधी मिळणार आहे. त्यामुळे आता प्रत्येक आमदाराला त्याच्या मतदारसंघात विकास कामांसाठी प्रत्येक वर्षी पाच कोटींचा निधी मिळणार होणार आहे. याच बरोबर आमदारांच्या ड्रायव्हरचा पगार 15 हजार रुपयावरुन 20 हजार तर आमदारांच्या पीएचा पगार 25 हजारावरुन 30 हजार करण्यांत आला आहे. विधानसभेतील आमदारांची संख्या 288 तर विधानपरिषदेचे 78 आमदार आहे.
