मुंबई (वृत्तसंस्था) ड्रग्ज प्रकरणात शाहरुख खानचा मुलगा आर्यन खानला एका दिवसाची कोठडी देण्यात आली आहे. कोर्टाने एक दिवसाची ही कोठडी सुनावली आहे. आर्यन खानसह इतर दोघांना एका दिवसासाठी एनसीबीच्या कोठडीत राहावं लागणार आहे. या दरम्यान त्यांची चौकशी केली जाणार आहे.
न्यायालयाने आर्यन खानसह इतर दोघांना एक दिवसाची एनसीबी कोठडी सुनावली आहे. आता ही कोठडी वाढणार की यांची सुटका होणार याचा निर्णय ४ ऑक्टोबर म्हणजेच उद्याच्या सुनावणीतच ठरणार आहे. एनसीबीकडून या एक दिवसात अधिक कसून चौकशी करुन आर्यन खानसह इतर आरोपींची कोठडी वाढवण्यासाठी प्रयत्न असेल. त्यामुळे न्यायालय नव्याने समोर येणाऱ्या पुराव्यांच्या आधारे काय निर्णय घेतं हे पाहणं महत्त्वाचं ठरणार आहे.
नेमकं प्रकरण काय?
अमली पदार्थ विरोधी पथकाने (एनसीबी) मुंबईत मोठी कारवाई केली आहे. मुंबईच्या समुद्रात क्रूझवर सुरु असलेल्या एका रेव्ह पार्टीवर धाड टाकत एनसीबीने आठ जणांना ताब्यात घेतलं आहे. यावेळी मोठ्या प्रमाणात ड्रग्जदेखील जप्त करण्यात आलं आहे. दरम्यान यावेळी क्रूझवर बॉलिवूड सुपरस्टार शाहरुख खानचा मुलगा आर्यन खानदेखील उपस्थित होता.
आर्यनसोबत इतर सात जणांनाही एनसीबीने ताब्यात घेतले होते. यावेळी एनसीबीने आर्यन खानची कसून चौकशी केली. त्याच्यासोबतच अरबाज मर्चेंट, मुनमुन धमेचा, नूपुर सारिका, इसमीत सिंह, मोहक जसवाल, विक्रांत छोकर, गोमित चोप्रा या सर्वांचीही एनसीबी चौकशी करण्यात आली. या चौकशीनंतर आर्यन खानसह दोघांना अटक करण्यात आली आहे.
