चंद्रपूर(वृत्तसंस्था) शहरात भाड्याच्या खोलीत राहून शिक्षण घेत असलेल्या एका अल्पवयीन विद्यार्थिनीचा सिंदेवाही पंचायत समितीतील विषयतज्ज्ञ म्हणून कार्यरत असलेल्या एकाने विनयभंग केल्याचा संतापजनक प्रकार गुरुवारी उघडकीस आला. भारत मेश्राम, असे संशयित आरोपीचे नाव आहे. तर मेश्रामविरुद्ध सिंदेवाही पोलीस ठाण्यात विविध कलमान्वये गुन्हे दाखल करून त्याला अटक करण्यात आलीय. शिक्षण क्षेत्राला काळीमा फासणाऱ्या या घटनेमुळे जिल्ह्याच्या शिक्षण क्षेत्रात खळबळ उडाली आहे.
एका विषयावर चर्चा करायच्या निमित्ताने पोहचला खोलीवर !
सिंदेवाही पंचायत समितीमध्ये विषयतज्ज्ञ म्हणून भारत मेश्राम हा कार्यरत आहे. त्याने तालुक्यात विविध स्पर्धा परीक्षा तसेच निबंध स्पर्धांचे आयोजन केले होते. दोन वर्षांपूर्वी याच माध्यमातून तालुक्यातील ग्रामीण भागात वास्तव्यास असलेली एक अल्पवयीन विद्यार्थिनी त्याच्या संपर्कात आली. ओळखीनंतर त्याचे त्या मुलीच्या घरी येणे-जाणे सुरू झाले. दरम्यान, यावर्षी त्या विद्यार्थिनीला सिंदेवाही शहरात त्याने भाड्याची खोली करून दिली. येथेच पीडित विद्यार्थिनी व तिचा भाऊ वास्तव्यास राहून शिक्षण घेत आहेत. दरम्यान, बुधवारी पीडित विद्यार्थिनीचा वाढदिवस होता. त्यामुळे विषयतज्ञ मेश्राम याने पिडीतेला मोबाइलवर फोन करून एका विषयावर चर्चा करायला मी तुझ्या खोलीवर येत असल्याचे सांगितले. त्यानंतर दुपारी ४.३० वाजताच्यासुमारास विद्यार्थिनीच्या खोलीवर गेला. यावेळी ती एकटीच खोलीवर असल्याची संधी साधून त्याने तिचा विनयभंग केला.
पोस्कोसह विविध कलमान्वये गुन्हा दाखल !
यावेळी विद्यार्थिनीने प्रतिकार करून जाब विचारताच त्याने तेथून पळ काढला. दरम्यान, काही वेळात तिचा भाऊ घरी आल्यानंतर तिने झालेल्या प्रकाराची भावाला माहिती दिली. त्यानंतर गावाकडे असलेल्या आई-वडिलांनाही याबाबत माहिती देण्यात आली. माहिती मिळताच आई-वडिलांनी सिंदेवाही गाठून पीडित विद्यार्थिनीला घेत पोलीस ठाणे गाठले व या प्रकाराची तक्रार दाखल केली. पोलिसांनी घटनेचे गांभीर्य लक्षात घेत आरोपी विषयतज्ज्ञ भारत मेश्राम याच्याविरुद्ध विविध कलम तसेच बालकांचे लैंगिक अपराधापासून संरक्षण अधिनियम २०१२ च्या ८ अन्वये गुन्हा दाखल करून अटक केली. या घटनेचा पुढील तपास उपविभागीय पोलीस अधिकाऱ्यांच्या मार्गदर्शनाखाली तपास सुरु आहे.
शिक्षकी पेशाला काळीमा !
शिक्षकी पेशाला काळीमा फासणाऱ्या या घटनेने सिंदेवाही तालुक्यात खळबळ उडाली आहे. सिंदेवाही पोलिसांनी गुरुवारी दुपारी आरोपी विषयतज्ज्ञ भारत मेश्राम याला अटक करून न्यायालयात हजर केले असता, न्यायालयाने त्याची न्यायालयीन कोठडीत रवानगी केली आहे. या घटनेचा सर्व स्तरातून निषेध केला जात असून परिसरात संतापाची लाट उसळली आहे.
