पाचोरा (प्रतिनिधी) तीन वेळा जबरदस्ती केलेल्या अत्याचारातून एक १३ वर्षीय मुलगी गर्भवती राहिल्याची संतापजनक घटना उघडकीस आली आहे. या प्रकरणी पाचोरा पोलिसात एकाविरुद्ध गुन्हा दाखल करण्यात आला आहे.
या संदर्भात पिडीत मुलीच्या वडिलांनी दिलेल्या फिर्यादीत म्हटले आहे की, तुषार वसंत गायकवाड (वय २२) याने मार्च २०२३ ते आजपावतो धमकी देऊन पिडीत १३ वर्षीय मुली सोबत तीन वेळा जबरदस्ती शारीरीक संबंध प्रस्थापित केलेत. यातून पिडीता मुलगी ५ महिन्यांची गर्भवती झाली आहे. पोट दुखत असल्याचे घरच्यांना सांगितल्यानंतर पिडीतेला दवाखाण्यात नेले असता धक्कादायक प्रकार उघडकीस आला. यानंतर पिडीतेच्या वडिलांनी पाचोरा पोलिसात धाव घेतली. पोलिसांनी देखील तात्काळ पोस्कोसह विविध कलमान्वये गुन्हा दाखल करण्यात आला असून पुढील तपास मपोउपनि विजया वसावे ह्या करीत आहेत. संशयित आरोपी तुषार गायकवाड याला पोलिसांनी अटक केली आहे.
