पाचोरा (प्रतिनिधी) एका १४ वर्षीय अल्पवयीन मुलीवर पाच ते सहा जणांनी सामूहिक अत्याचार केल्याची धक्कादायक घटना उघडकीस आल्यामुळे जिल्ह्यात प्रचंड खळबळ उडाली आहे. दरम्यान, पीडित मुलीला रुग्णालयात उपचारार्थ दाखल करण्यात आले आहे.
यासंदर्भात अधिक असे की, पाचोरा तालुक्यातील एका गावात १४ वर्षीय अल्पवयीन मुलगी शुक्रवारी १३ मे रोजी रात्री ९ वाजता गल्लीतील मैत्रीणीसोबत बोलत होती. मात्र, रात्री उशीरापर्यंत मुलगी घरी आली नाही म्हणून घरच्यांनी तिचा सर्वत्र शोध सुरू केला. गावातील २० ते २५ जणांनी दुचाकी काढून गावातील आजूबाजूच्या शेतात शोधमोहिम राबविली. गावातील वातावरण शांत झाल्यानंतर अज्ञात ५ ते ६ जणांनी १४ वर्षीय मुलीला उचलून नेत तिच्यावर सामूहिकरित्या अत्याचार केला आणि पिडीत मुलीला पहाटे ३ वाजेच्या सुमारास गावातील महिलांच्या शौचालयाजवळ सोडून दिले. अल्पवयीन मुलगी घरी आल्यावर हा प्रकार उघडकीला आला. पिडीत मुलीला पाचोरा ग्रामीण रुग्णालयात उपचारार्थ दाखल करण्यात आले आहे. संशयित आरोपी हे गावातीलच असल्याची शक्यता असून त्यांच्या शोधार्थ पोलीस पथक रवाना झाले आहे. दरम्यान, जिल्ह्यात प्रचंड खळबळ उडाली आहे.
