लाहोर (वृत्तसंस्था) पाकिस्तानचे पंतप्रधान इम्रान खान यांना कोरोनाची लागण झाली आहे. राष्ट्रीय आरोग्य सेवा, नियम आणि समन्वय विभागासाठी इम्रान खान यांचे विशेष सहाय्यक म्हणून काम करणारे फैजल सुल्तान यांनी ट्विट करत ही माहिती दिली आहे. विशेष म्हणजे काही दिवसांपूर्वीच इम्रान खान यांनी चिनी कोरोना प्रतिबंधक लसीचा डोस घेतला होता.
१८ मार्चला इम्रान खान यांनी चिनी करोना प्रतिबंधक लस सिनोफार्म लसीचा डोस घेतला होता. पाकिस्तानमध्ये सध्या फक्त ही एकमेव लस उपलब्ध आहे. या लसीचे दोन डोस घेणं अनिवार्य आहे. चीनने १ फेब्रुवारीला पाकिस्तानला सिनोफार्म लसीटे पाच लाख डोस दिले होते. यानंतर पाकिस्तानमध्ये लसीकरण मोहीम सुरु करण्यात आली. आपण कोरोनाबाधित असल्याचं लक्षात येताच खान यांनी गृह विलगीकरणात राहण्याचा निर्णय घेतल्याची माहिती तेथील आरोग्यमंत्र्यांनी दिली. राजकीय पटलावर आपली कारकिर्द सुरु करण्यापूर्वी इमरान खान यांनी क्रिकेटचं मैदानही गाजवलं आहे.
कोवॅक्स लसही मिळण्याची आशा
दरम्यान, पाकिस्तानला चीनशिवाय जागतिक आरोग्य संघटनेची (WHO) कोवॅक्स ही लसही मिळण्याची आशा आहे. डब्लूएचओ कडून गरिब आणि कमी उत्पन्न असलेल्या राष्ट्रांना ही लस पुरवण्यात येत आहे. यानुसार पाकिस्तानला १ कोटी ७१ लाख ६० हजार डोस मिळणार आहेत. सध्या पाकिस्तानातही ६० वर्षावरील ज्येष्ठ नागरिक आणि आरोग्य कर्मचाऱ्यांना लस देण्यात येत आहे.
