पारोळा (प्रतिनिधी) येथील राष्ट्रीय महामार्गावर ट्रक अन् महिंद्रा पिकअप गाडीचा समोरासमोर अपघात झाल्याने त्यात एकाचा जागीच मृत्यू झाला तर तीन जण जखमी झाल्याची घटना घडली. दरम्यान, रस्त्याच्या संथगतीने सुरु असलेल्या कामामुळे अन् चुकीच्या दिशादर्शकामुळे हा अपघात झाल्याचा नागरिकांचा आरोप आहे.
राष्ट्रीय महामार्ग ५३वरील तालुक्यातील विचखेडे गावाजवळ जळगावहून धुळ्याकडे जाणारी ट्रक (एमएच- १५, जीव्ही- ७८२७) हीने २७ रोजी सायंकाळी साडेपाच वाजेच्या सुमारास समोरून धुळ्याकडून पारोळ्याच्या दिशेला येणारी महिंद्रा पिकअप (एमएच- १९, सीवाय-५०७६) ला जबर धडक दिली. या अपघातात धुळे येथील चालक रफिक अहमद शरीफ अहमद (वय ४०), अखिल अहमद अब्दुल सत्तार तसेच पारोळा येथील सिद्धार्थ नगरमधील पूजा राजेश बागुल (वय २५) हे जखमी झालेत. तर नगरदेवळा येथील रवींद्र कौतिक बागुल (५०) यांना गंभीर इजा झाल्याने त्यांचा जागीच मृत्यू झाला. घटनास्थळी नरेंद्राचार्य महाराज संस्थानाचे रुग्णवाहिका चालक आशुतोष शेलार यांनी जखमींना पारोळा कुटीर रुग्णालयात उपचारार्थ दाखल केले.
दरम्यान, रवींद्र बागुल हे आपल्या वहिनींना धुळे येथे रुग्णालयात उपचारासाठी घेऊन गेले होते. उपचार करून ते घरी येत असताना ही घटना घडली. यामुळे पारोळा शहरातील सिद्धार्थनगर भागात शोककळा पसरली आहे. याबाबत रात्री उशिरापर्यंत पारोळा पोलिसात गुन्हा दाखल करण्याचे काम सुरू होते. दरम्यान, विचखेडे गावाजवळ गुरूवारी रात्री १० वाजता तसेच शनिवारी रात्री साडेतीन वाजेच्या सुमारास दोन वाहनांचा अपघात झाला होता. त्यात युवक गौरव नारायण पाटील (वय ३०), सुजित पावरा, यश पावरा, लविष पावरा (सर्व रा. धुळे) हे जखमी झालेत. रस्त्याचे कासव गतीने सुरु असलेले काम व चुकीचा दिशादर्शक फलकामुळे दोन दिवसांत हा चौथा अपघात झाला आहे.
