चाळीसगाव (प्रतिनिधी) मोदीजींना पुन्हा पंतप्रधान करण्यासाठी देशाची १४० कोटी जनता आतूर असल्याचं प्रतिपादन आमदार मंगेशदादा चव्हाण यांनी केले. ते पातोंडा वाघळी जिल्हा परिषद गटातील हातले येथील भव्य मेळाव्यात बोलत होते.
जळगाव लोकसभा मतदारसंघातील महायुतीच्या उमेदवार स्मिताताई वाघ यांच्या प्रचारार्थ मंगळवारी महायुतीचा पातोंडा वाघळी जिल्हा परिषद गट भव्य मेळावा हातले येथे संपन्न झाला. यावेळी तालुक्यातील महाविकास आघाडी मधील शेकडो कार्यकर्त्यांनी भारतीय जनता पक्षात प्रवेश केला. या मेळाव्याला भारतीय जनता पार्टी, शिवसेना, राष्ट्रवादी, रिपाई, रासप, एकलव्य संघटना महायुतीचे पदाधिकारी कार्यकर्ते हजारोंच्या संख्येने उपस्थित होते.
विश्वासाचे दुसरे नाव म्हणजे मोदीजी !
यावेळी मंगेशदादा चव्हाण पुढे म्हणाले की, विश्वासाचे दुसरे नाव म्हणजे मोदीजी आणि विकासाचे दुसरे नाव म्हणजे मोदीजीच आहे. लोकांचा विश्वास पंतप्रधान नरेंद्र मोदीजींसोबत आहे त्यामुळे मोदीजींना पुन्हा पंतप्रधान करण्यासाठी या देशाची १४० कोटी जनता आतूर आहे. लोकसभा निवडणुकीची ही लढाई महायुती विरुद्ध महाविकास आघाडी अशी नसून जगभरात भारताचा सन्मान वाढवणारे पंतप्रधान नरेंद्र मोदीजी विरुद्ध देशाची बदनामी करत फिरणारे राहुल गांधी व इंडी आघाडी यांच्यातच आहे.
पक्षाच्या जीवावर मोठे होऊनही गद्दारी करणाऱ्यांना चाळीसगावची जनता जागा दाखवेल !
पक्षाच्या जीवावर मोठे होऊन त्याच्याशी गद्दारी करणाऱ्याना देखील चाळीसगावची स्वाभिमानी जनता यानिमित्ताने जागा दाखवेल. कमळ या चिन्हाला मत म्हणजे मोदीजींना मत म्हणजेच देशाच्या विकासाला मत अशी जनमाणसांची भावना आहे. त्यामुळे स्मिताताई वाघ यांना भव्य मताधिक्याने विजयी करावे,असेही आवाहन आमदार मंगेशदादा चव्हाण य्हानी यावेळी केले.
