भुसावळ (प्रतिनिधी) शहरातील जामनेर रोडवरील हॉटेल प्रीमियमजवळ सार्वजनिक जागी २ व्यक्ती अवैधरित्या जुगार खेळत असल्याचे उघडकीस आले. पोलिसांनी रवींद्र रामचंद्र दांईजे (रा. जाम मोहल्ला) आणि योगेश शंकर जाधव (रा. बद्री प्लॉट, भुसावळ) यांना रंगेहाथ ताब्यात घेतले. त्यांच्याकडून २ हजार २४० रुपये रोख व जुगाराचे साहित्य जप्त करण्यात आले आहे.
दरम्यान, शहरातील अवैध धंदे २६ जानेवारीपर्यंत बंद करण्यासाठी राष्ट्रवादी काँग्रेस (शरदचंद्र पवार गट) ने पोलीस प्रशासनाला निवेदन दिले होते. या निवेदनात कारवाई न झाल्यास तीव्र आंदोलनाचा इशाराही दिला होता. या पार्श्वभूमीवर पोलीस प्रशासनाने अवैध धंद्यांविरोधात ठोस पाऊल उचलले असून, अशा प्रकारच्या कारवाई सातत्याने सुरू राहणार असल्याचे अधिकारी म्हणाले. ही कारवाई पो.नि. राहुल वाघ यांच्या मार्गदर्शनात करण्यात आली. तर सोपान पाटील यांच्या फिर्यादीवरून बाजारपेठ पोलीस ठाण्यात गुन्हा दाखल करण्यात आला आहे. तपास पोलीस कर्मचारी तेजस पारीसकर करत आहेत.
