जळगाव (प्रतिनिधी) – आरोपीला अटक न करण्याच्या मोबदल्यात पोलीस हवालदाराच्या नावाने २० हजारांची लाचेची मागणी केल्याप्रकरणी पंटरविरुद्ध गुन्हा दाखल करण्यात आला आहे. पंटरने पोलीस अंमलदार महेश चौधरी यांच्याकरीता लाचेची मागणी केल्याचे संभाषणातून स्पष्ट झाले असून ही बाब पोलीस खात्याची प्रतिमा मलीन करणारी असल्याचा ठपका ठेवत महेश चौधरी यांना निलंबीत करण्यात आले. तसेच त्यांची खात्यांतर्गत चौकशी करण्याचे आदेश पोलीस अधीक्षक श्रीकांत धिवरे यांनी दिले.
भुसावळ तालुका पोलीस ठाण्यात दाखल असलेल्या गुन्ह्यात आरोपीला अटक न करण्याच्या मोबदल्यात पोलीस हवालदार महेश चौधरी यांच्याकरीता खासगी पंटरने तक्रारदाराकडे २० हजारांच्या लाचेची मागणी केली होती. लाचेची रक्कम प्रत्यक्ष स्विकारली गेलेली नाही, मात्र दि. ३ ऑगस्ट रोजी मागणी पडताळणीसह डिजीटल व्हाईस रेकॉर्डरमधील संभाषणावरुन खासगी पंटर अजय सनसोये विरुद्ध गुन्हा दाखल करण्यात आला आहे. पोलीस अंमलदार महेश चौधरी यांचे वर्तन हे बेजबाबदारपणाचे आणि बेशिस्तचे आहे. त्यांच्या वर्तवणुकीमुळे पोलीस खात्याची प्रतिमा जनमानसात खबराव होवून डागाळल्याचा ठपका ठेवत त्यांना शासकीय सेवेतून निलंबित करण्यात आले आहे.
प्राथमिक चौकशीचे दिले आदेश
शासकीय सेवेतून निबंबणाच्या आदेशाबरोबरच महेश चौधरी यांच्याविरुद्ध प्राथमिक व विभागीय चौकशी करण्याचे आदेश पोलीस अधीक्षक श्रीकांत धिवरे यांनी काढलेत. निलंबण काळात त्यांना लेखी पुर्वपरवानगीशिवाय मुख्यालय सोडून अन्यत्र जाता येणार नाही. तसेच दररोज राखीव पोलीस निरीक्षकांकडे दोन वेळेस हजेरी द्यावी लागणार आहे.
