मुंबई (वृत्तसंस्था) मराठी सिने अभिनेत्री तेजस्विनी पंडित हिनं सोशल मीडियाच्या माध्यमातून सध्याच्या राजकीय खेळीवर अत्यंत बोचरी टीका केली आहे. सध्या तिची ही पोस्ट चांगलीच व्हायरल होत आहे. ‘राजकारण म्हणजे कोविडपेक्षा एक भयाण कीड, असाच उल्लेख तिनं आपल्या पोस्टमधून केलाय.
कोरोना काळात जिथं साऱ्या देशानं एकत्र येऊन या संकटावर मात करण्याची अपेक्षा होती, तिथंच भारतात चित्र काहीसं वेगळं असल्याचं पाहायला मिळत आहे. राजकीय नेते, पक्ष आपलीच पोळी भाजून घेत अनेकदा श्रेय लाटण्यासाठीच जास्त प्रयत्नशील असल्याचं पाहायला मिळत आहे. तर कुणाच कुरघोडी करण्याची वृत्ती संताप देऊन जात आहे. जनतेनं जनतेच्याच सेवेसाठी म्हणून निवडून दिलेल्या या नेतेमंडळींच्या भूमिका आणि सध्या सुरु असणारी त्यांची राजकीय खेळी पाहून अभिनेत्री तेजस्विनी पंडित हिनं सोशल मीडियाच्या माध्यमातून अत्यंत बोचरी पोस्ट लिहिली.
‘सगळ्यात मोठी कीड आपल्या देशाला, आपल्याच नाही तर सगळ्या जगाला लागली आहे, ती आहे राजकारण. ही कीड कोविडपेक्षा भयाण, घातक आणि वर्षानुवर्ष आपल्याला पोखरत जाणारी आहे. या कीडीपासून बचाव करता आला तर बघा’, असं तिनं या पोस्टमध्ये लिहिलं. परिस्थिती नेमकी किती बिकट आहे हे सांगताना, ‘अवघड आहे सगळंच…. काळजी घ्या’ हे तिचे शब्द सर्वांनाच विचार कराय़ला भाग पाडत आहेत.
