धरणगाव (प्रतिनिधी) काही दिवसांपूर्वी एका महिलेच्या नावाने जळगाव जिल्हा विशेष शाखेच्या (डीएसबी) अधिकारी, कर्मचाऱ्यांना अश्लील मॅसेज पाठविल्याप्रकरणी पोलीस हेड कॉन्स्टेबल नरेंद्र लोटन पाटील (वारुळे) याला जळगावनंतर आज धरणगावच्या गुन्ह्यातही जामीन मिळाला आहे.
पोलीस कर्मचारी नरेंद्र वारुळे याचा जळगावच्या गुन्ह्यात १५ हजाराच्या वैयक्तीक जात मुचलक्यावर जामीन मंजूर करण्यात आला होता. ज्या पोलिसांना अश्लील मॅसेज गेले, त्यात एका महिला पोलीस कर्मचाऱ्याचाही क्रमांक होता. त्यामुळे याच महिला पोलीस कर्मचाऱ्याच्या फिर्यादीवरून सायबर ठाण्यात गुन्हा दाखल झाला होता. धरणगाव, अमळनेर व नाशिक येथे दाखल गुन्ह्यांमध्ये देखील वारुळे यांचा सहभाग असल्याचा संशय पोलिसांना होता. दरम्यान, नरेंद्र वारुळे याला जामीन मंजूर झाल्यानंतर उत्तर महाराष्ट्र विद्यापीठ कॉलनीतील एका महिला कर्मचाऱ्याच्या तक्रारीवरून दाखल गुन्ह्यात धरणगाव पोलिसांनी ताब्यात घेतले होते. दरम्यान, आज धरणगाव न्यायालयात हजर केल्यानंतर न्या. सावरकर यांनी वारुळेला १५ हजाराच्या वैयक्तीक जात मुचलक्यावर जामीन मंजूर केला. संशयिताकडून अॅड. विजय पाटील आणि अॅड.कुणाल पवार यांनी कामकाज पहिले. दरम्यान, पोलीस दलातील अंतर्गत वादातून वारुळे यांना या प्रकरणात गोवले जात असल्याचा युक्तिवाद त्यांचे अॅड. विजय पाटील आणि अॅड.कुणाल पवार यांनी न्यायालयात केला होता.
