मुंबई (वृत्तसंस्था) विधानपरिषदेचे विरोधी पक्षनेते प्रविण दरेकर यांच्या अडचणीत वाढ होण्याची शक्यता आहे. प्रवीण दरेकर यांच्यावर आरोप असलेल्या मुंबै बँक गैरव्यवहार प्रकरणाची आता खोलात जाऊन चौकशी करण्यात येणार आहे. मुंबई बँकेच्या प्राथमिक चौकशी अहवालात गंभीर बाबी आढळल्याने आता बँकेचे सविस्तर ऑडीट करण्याचा सहकार विभागाकडून निर्णय घेण्यात आला आहे.
गेल्या काही दिवसांमध्ये विविध मुद्द्यांवरुन महाविकासआघाडी सरकारविरुद्ध रान उठवण्यात आघाडीवर असलेले भाजप आमदार प्रवीण दरेकर यांना मोठा धक्का बसण्याची शक्यता आहे. प्रवीण दरेकर यांच्यावर आरोप असलेल्या मुंबै बँक गैरव्यवहार प्रकरणाची आता खोलात जाऊन चौकशी करण्यात येणार आहे. त्यासाठी सहकार विभागाने मुंबै बँकेतील विविध शाखांचे सविस्तर लेखापरीक्षण (ऑडिट) करण्याचा निर्णय घेतला आहे. त्यामुळे प्रवीण दरेकर यांच्या अडचणीत वाढ होण्याची शक्यता आहे. प्राथमिक माहितीनुसार, नाबार्डने यासंदर्भात दिलेल्या अहवालानंतर सहकार विभागाने सविस्तर ऑडिट करण्याचा निर्णय घेतल्याचे समजते. १६ फेब्रुवारीला हा अहवाल सुपूर्द करण्यात आला होता. यामध्ये मुंबै बँकेच्या विविध शाखांमध्ये भाडे करार, आधुनिकीकरण, संगणकीकरण आणि फर्निचर खरेदीच्या व्यवहारांमध्ये गंभीर त्रुटी असल्याचे निदर्शनास आले आहे. त्यामुळे आता या सर्व शाखांचे ऑडिट होईल. त्यामधून आता काय समोर येणार, याकडे सर्वांचे लक्ष लागले आहे.
पूजा चव्हाण आत्महत्या प्रकरण प्रविण दरेकरांनी लावून धरला होता. आमच्या दबावामुळे संजय राठोडांचा राजीनामा घेतला गेलाय, असं वक्तव्य त्यांनी केलं होतं. तसेच एकाला एक न्याय आणि दुसऱ्याला एक असं न करता संजय राठोडांप्रमाणेच धनंजय मुंडेंचा राजीनामा घ्यावा. पंकजा मुंडेंनी केलेली मागणी रास्त आहे, असं देखील दरेकर म्हणाले होते. नैतिक जबाबदारी स्विकारून धनंजय मुंडे यांनी राजीनामा द्यायला हवा, असं ते म्हणाले.
यावेळी दरेकर यांनी वीजबिलावरून राज्य सरकारवर टीका केली. हे सरकार लुटारू आहे. शेतकऱ्यांची लूट करत आहेत. आता केवळ आम्ही विधानभवनाच्या पायरीवर बसून आंदोलन करत आहोत. ये तो सिर्फ झांकी है, पिक्चर अभी बाकी है, असं सांगत दरेकर यांनी वीजबिलाच्या मुद्द्यावरून सरकारला धारेवर धरण्याचा इशाराच दिला.
