नवी दिल्ली (वृत्तसंस्था) वाढत्या कोरोना रुग्णांचा विचार करता १८ वर्षाखालील मुलांनाही लसीकरणाबाबत तज्ज्ञांचे प्रयत्न सुरू आहेत. लसीकरणासाठी सुरू असलेले प्रयत्नात सर्व काही व्यवस्थित झाल्यास कॅनडा आणि अमेरिकेनंतर भारताततही २ ते १८ वर्षे वयोगटातील मुलांना कोरोना प्रतिबंधक स्वदेशी लस लवकरच तयार असणार आहे. अधिकृत सुत्रांच्या मते, भारत बायोटेकच्या कोवॅक्सिनच्या दुसऱ्या आणि तिसऱ्या चाचणीची शिफारस केली आहे.
कोरोनाच्या दुसऱ्या लाटेत लहान मुलांना लागण होण्याचे प्रमाण वाढत असल्याचे चित्र पाहायला मिळत आहे. कोरोनाच्या या लढाईत आता मुलांसाठी येत्या काही दिवसात चांगली बातमी मिळण्याची शक्यता वर्तवण्यात येत आहे. अधिकृत सूत्रांनी सांगितल्यानुसार, सेंट्रल ड्रग्स स्टँडर्ड कंट्रोल ऑर्गेनायजेशनच्या सब्जेक्ट एक्सपर्ट्स कमेटीने मंगळवारी भारत बायोटेकच्या कोव्हॅक्सिनच्या दुसऱ्या आणि तिसऱ्या ट्रायल्सची शिफारस केली आहे. ही चाचणी महाराष्ट्राची उपराजधानी नागपूरमधील मेडिट्रिना मेडिकल सायन्स इन्स्टिट्यूट, दिल्ली तसंच पाटण्यातील एम्ससह विविध ठिकाणी केली जाईल.
२ ते १८ वर्षे वयोगटातील मुलांमध्ये सुरक्षा आणि रोगप्रतिकारशक्ती वाढवण्यासोबतच इतर गोष्टींचं आकलन करण्यासाठी कोवॅक्सिन डोसच्या दुसऱ्या/तिसऱ्या टप्प्याच्या चाचणीसाठी परवानगी देण्याची विनंती भारत बायोटेकने केली होती. केंद्रीय औषध मानक नियंत्रण संस्था म्हणजेच सीडीएससीओच्या कोविड-१९ विषयक तज्ज्ञ समितीने मंगळवारी (११ मे) भारत बायोटेकच्या विनंतीवर विचारविनिमय केला. त्यानंतर समितीने प्रस्तावित दुसरे/तिसरे टप्प्यातील चाचणीसाठी परवानगी देण्याची शिफारस केल्याचं समजतं.
काही दिवसांपूर्वी तिसऱ्या टप्प्यातील चाचणीचे निष्कर्ष जाहीर करताना आयसीएमआर आणि भारत बायोटेकने म्हटलं होतं ती, सामान्य कोरोनाबाधित रुग्णांवर कोवॅक्सिन ही लस ७८ टक्के प्रभावी आहे. इतकंच नाही तर कोरोना व्हायरसच्या डबल म्यूटेंटविरोधात अँटीबॉडी बनवण्याचं काम भारत बायोटेकची कोवॅक्सिन ही लस करते, असं वृत्त अमेरिकेचं वृत्तपत्र न्यूयॉर्क टाइम्सने प्रकाशित केलं होतं.
दरम्यान भारत बायोटेकने देशातील विविध राज्यांमध्ये आपल्या कोवॅक्सिन या कोरोना प्रतिबंधक लसीचा पुरवठा सुरु केला आहे. भारत बायोटेक कंपनीने ट्वीटद्वारे ही माहिती दिली आहे. आंध्र प्रदेश, आसम, छत्तीसगड, दिल्ली, गुजरात, जम्मू आणि काश्मीर, झारखंड, मध्य प्रदेश, महाराष्ट्र, ओदिशा, तामिळनाडू, तेलंगणा, उत्तर प्रदेश आणि पश्चिम बंगाल या राज्यांचा यात समावेश आहे.
अमेरिकेत १२ ते १५ वयोगटासाठी व्हॅक्सीनला परवानगी
यापूर्वीच, सोमवारी अमेरिकेच्या फूड अँड ड्रग अॅडमिनिस्ट्रेशनने १२ ते १५ वर्षांच्या मुलांसाठी फायजर-बायोएनटेकच्या कोरोना लसीला परवानगी दिली आहे. आतापर्यंत ही लस १६ वर्षांपेक्षा जास्त वयोगटाला देण्यात येत होती. तिकडे, कॅनडाने मुलांच्या लसीला परवानगी दिली आहे. लहान मुलांच्या व्हॅक्सीनला परवानगी देणारा कॅनडा पहिला देश आहे.
