जळगाव (प्रतिनिधी) आशादीप वसतीगृहात पोलिसांनी महिलांना नग्न करुन नृत्य करायला लावल्याचा प्रकार खोटा असल्याचे समोर आल्यानंतर आता राष्ट्रवादीचे नेते एकनाथ खडसे चांगलेच आक्रमक झाले आहेत. जे घडलेच नाही ते झाल्याचा आव आणत विरोधी पक्षाने जळगावची बदनामी केली आहे. यामुळे याप्रकरणी विरोधी पक्षाने जळगावकरांसह राज्याची जाहीर माफी मागावी अशी मागणी माजी मंत्री एकनाथराव खडसे यांनी केली आहे.
जळगाव येतील आशदीप वसतीगृहात कथीतरीत्या गैरप्रकार झाल्याचे प्रकरण गाजत आहे. यात विरोधी पक्षांनी विधीमंडळ अधिवेशनात आक्रमक पवित्रा घेत सरकारवर टीका केली. यात चक्क राज्यात राष्ट्रपती राजवट लागू करण्याची मागणी देखील करण्यात आली. प्रत्यक्ष चौकशी मात्र असला कोणताही प्रकार घडलाच नसल्याचे दिसून आले. या पार्श्वभूमिवर, माजी मंत्री तथा राष्ट्रवादी काँग्रेसचे ज्येष्ठ नेते एकनाथराव खडसे यांनी विरोधी पक्षावर सडकून टीका केली. खडसे म्हणाले की, आशादीप प्रकरणी जे झालेच नाही त्याबद्दल विधानसभेत गोंधळ घालण्यात आला. यामुळे जळगावची खूप बदनामी झाली. जबाबदार विरोधी पक्षाने याबाबत खरी माहिती घेऊन वक्तव्य करणे अपेक्षित असतांना खोट्या माहितीच्या आधारे थेट राष्ट्रपती राजवटीची मागणी करण्यात आली. मात्र हे प्रकरण पूर्णपणे खोटे असल्याचे समोर आल्याने विरोधी पक्षाचा दावा देखील उघडा पडला आहे.
आम्ही देखील यापूर्वी अशा स्वरूपाचे आरोप केले तेव्हा पुरावे दिले होते. यातून संबंधीतांना शिक्षा देखील झाली होती. मात्र विरोधी पक्षाने सर्व संकेत गुंडाळून ठेवत सरकारवर आरोप केले. यामुळे आता विरोधी पक्षाने जळगावकरांसह राज्याची जाहीर माफी मागावी अशी मागणी एकनाथराव खडसे यांनी याप्रसंगी केली आहे. या माध्यमातून खडसे यांनी माजी मुख्यमंत्री तथा विद्यमान विरोधी पक्षनेते देवेंद्र फडणवीस यांचा उल्लेख न करता त्यांच्यावर जोरदार टीकास्त्र सोडल्याचे दिसून येत आहे.
नेमके प्रकरण काय?
जळगावमधील आशादीप या शासकीय महिला वसतिगृहात तरुणींना कपडे काढून नृत्य करायला भाग पाडल्याचा आरोप करण्यात आला होता. जिल्हाधिकाऱ्यांकडे या कृत्याचा व्हिडीओही सादर केला होता. जिल्हाधिकारी अभिजित राऊत यांनी तातडीने दखल घेऊन या प्रकरणाची चौकशी करण्याचे आश्वासन दिले होते. हा प्रकार खडल्यानंतर राज्यात खळबळ उडाली होती. राज्यभरातून महाराष्ट्र पोलीस आणि राज्य सरकार यांच्यावर टीका करण्यात आली. याच मुद्द्यावरुन भाजपच्या अनेक बड्या नेत्यांनी सरकारला धारेवर धरलं. विधानसभेतही हा मुद्दा चांगलाच गाजला होता. मात्र, त्यानंतर जळगावमध्ये महिलांना नृत्य करायला लावण्याचा कोणताही प्रकार घडलाच नसल्याचे नंतर समोर आले.
