धरणगाव (प्रतिनिधी) पालकमंत्री गुलाबराव पाटील यांच्या मूळ गावी समाजसेवेच्या उद्देशाने दोन रुग्णवाहिकांची सेवा सुरु केली आहे. यातील एका रुग्णवाहिकेचे अज्ञात माथेफिरुने नुकसान केले असून या घटनेचा धरणगावात जिल्हा शिवसेनेतर्फे जाहीर निषेध करण्यात आला आहे.
परिसरातील गरीब रुग्णांना तत्काळ सेवा मिळावी, या उद्देशाने पालकमंत्र्यांनी सर्वांच्या हितासाठी मोफत रुग्णवाहिका सेवा सुरु केली आहे. ही सेवा मोफत असल्याने रुग्णांना त्याचा लाभ होतो. हे काम वाहकाच्या आधारे केले जात आहे. अनेक वर्षांपासून पालकमंत्री समाजसेवेचे हे कार्य करत आहेत. परंतु, काही समाजकंटकांनी दोन रुग्णवाहिकांची तोडफोड केली आहे. या रुग्णवाहिकेवर आनंद दिघे, मुख्यमंत्री एकनाथ शिंदे, पालकमंत्री गुलाबराव पाटील उपमुख्यमंत्री देवेंद्र फडणवीस यांचे फोटो ही काढण्याचा प्रयत्न केला आहे.
अशा द्वेष भावनेतून केलेल्या कृतीच्या जळगाव जिल्हा शिवसेनेतर्फे जाहीर निषेध करतो व जे दोषी असतील त्यांचा शोध घेऊन त्यांच्यावर तत्काळ कारवाई करावी, अशी मागणी शिवसेनेचे प्रवक्ते माजी नगराध्यक्ष पी. एम. पाटील यांनी केली आहे. या संदर्भात धरणगावचे पोलीस निरीक्षक उद्धव ढमाले यांच्याशी चर्चा करून तत्काळ समाजात द्वेष पसरवणाऱ्या या वृत्तीचा शोध घ्यावा, असे त्यांनी आवाहन केले.
