सोलापूर (वृत्तसंस्था) गुलबर्गाहून (कर्नाटक) करमाळा मार्गे शिर्डी येथे साईबाबांच्या दर्शनासाठी निघालेल्या भाविकांवर बुधवारी (दि. २७) पहाटे काळाने घाला घातला. भरधाव कार करमाळा- परंडा मार्गावर पांडे गावाजवळ (ता. करमाळा, जि. सोलापूर) पहाटे साडेपाच वाजण्याच्या सुमारास कंटेनरवर जाऊन आदळली. या भीषण अपघातात चौघांचा जागीच मृत्यू झाला, तर सहाजण जखमी झाले. हा अपघात एवढा भीषण होता की, अपघातातील कार कंटेनरला धडकून रस्त्यापासून खाली जाऊन पलटी होऊन चक्काचूर झाली.
अपघातातील कार ही गुलबर्गाहून करमाळा-पांडे मार्गे शिर्डीला देवदर्शनासाठी जात होती. कार पांडे येथील गावातून फिसरेच्या बाजूला असलेल्या वळणावर आली. यावेळी भरधाव कार कंटेनरवर आदळली. वेग प्रचंड असल्याने कार कंटेनरवर आदळल्यानंतर रस्त्याच्या खाली दूरवर जाऊन पलटी झाली. या अपघातात कार चक्काचूर झाली आहे. या अपघातात श्रीशैल चांदेगा कुंभार (५५), शशिकला श्रीशैल कुंभार (५०), ज्येमी दीपक हुनशामठ (३८, रा. गुलबर्गा व शारदा हिरेमठ (६७, रा. हुबळी) हे जागीच ठार झाले. तर सौम्या श्रीधर कुंभार (२६), कावेरी विश्वनाथ कुंभार (२४), शशिकुमार त्रिशाला कुंभार (३६), श्रीदार श्रीशाल कुंभार (३८), नक्षत्रा विश्वनाथ कुंभार (८ महिने) व श्रीकांत रामकुमार चव्हाण (२६) हे जखमी झाले आहेत.
अपघाताची माहिती समजताच करमाळा पोलीस घटनास्थळी दाखल झाले. जखमींना करमाळा उपजिल्हा रुग्णालयात दाखल करण्यात आले आहे. अपघाताचे कारण नेमके समजलेले नसून पांडे येथील नागरिकांनी अपघातग्रस्तांना मदत केली. जखमींमध्ये नव वधु-वर असल्याचेही सांगितले जात आहे. सर्व जखमींवर डॉ. गजानन गुंजकर व डॉ. कोळेकर यांच्या मार्गदर्शनाखाली उपचार सुरू आहेत.
