जळगाव (प्रतिनिधी) घरगुती वापरच्या सिलींडरमधून कमर्शियल वापराच्या सिलींडरमध्ये गॅस रिफिलींग करणाऱ्यांवर शनिपेठ पोलिसांनी छापा टाकला. या कारवाईत ६१ गॅस सिलींडरसह रिफलींगचे साहित्य व वाहन असा एकूण २ लाख २३ हजारांचा मुद्देमाल जप्त करण्यात आला. ही कारवाई मंगळवारी दुपारच्या सुमारास असोदा रोडवरील पिवळ्या भिंतीजवळील पत्र्याचया शेडमध्ये केली. याप्रकरणी तीन जणांविरुद्ध गुन्हा दाखल करण्यात आला आहे.
शहरातील असोदा रोडपरिसरात असलेल्या पिवळ्या भिंती परिसरात एका घरामध्ये घरगुती वापराच्या गॅस सिलींडरमधून कमर्शियल गॅस सिलींडरमध्ये अवैधरित्या गॅस रिफलींग होत असल्याची माहिती शनिपेठ पोलीस ठाण्याच्या पोलीस निरीक्षक कावेरी कमलाकर यांना मिळाली. त्यांनी लागलीच गुन्हे शोध पथकातील पोहेकॉ शशिकांत पाटील, प्रदीप नन्नवरे, कमलेश पाटील, विक्की इंगळे, गजानन वाघ, नवजीत चौधरी, रविंद्र साबळे, अमोल वंजारी, निलेश घुगे, पराग दुसाने यांचे पथक तयार करुन त्या कारवाईसाठी रवाना झाल्या.
सव्वादोन लाखांचा ऐवज हस्तगत
छापा टाकल्यानंतर पोलिसांनी ताब्यात घेतलेल्या तिघांची कसून चौकशी केली. मात्र त्यांच्याकडून उडवाउडवीची उत्तरे दिली जात होती. दरम्यान, पोलिसांनी तेथून ६१ गॅस सिलींडर, गॅस भरण्यासाठी लागणारे मोटारपंप व मालवाहतुक रिक्षा असा एकूण २ लाख २३ हजार रुपयांचा ऐवज जप्त केला. याप्रकरणी पोलीस कर्मचारी गजानन वाघ यांनी दिलेल्या फिर्यादीवरुन तिघांविरुद्ध गुन्हा दाखल करण्यात आला आहे.
गॅस रिफलींग करणाऱ्या तिघे जेरबंद
पोलीस पिवळ्या भिंती परिसरात गेल्यानंतर त्यांनी एका पत्र्याच्या शेडमध्ये इलेक्ट्रीक मोटारपंपाद्वरे गॅस दुसऱ्या सिलींडरमध्ये भरत असतांनाच पथकाने छापा टाकून गॅस भरणाऱ्या संशयित नारायण दाजीबा सोनवणे (वय ६०), राहूल नारायण सोनवणे (वय २९, रा. दोघ रा. दिनकर नगर, पिवळ्या भिंतीजवळ) व आदेश राजू पाटील (वय २३, रा. दिनकर नगर, हनुमान मंदिराजवळ) यांच्या मुसक्या अवळल्या.
