नवी दिल्ली (वृत्तसंस्था) राफेल विमान गैरव्यवहार प्रकरणाची फ्रांस सरकारने स्वतंत्र न्यायाधिशांकरवी चौकशी करण्याची घोषणा केल्यानंतर कॉंग्रेसने पुन्हा हा विषय जोरदारपणाने लावून धरला आहे. या संबंधात कॉंग्रेसचे नेते राहुल गांधी यांनी तर ट्विटरवर एक ऑनलाईन सर्व्हेच घेतला आहे. त्यांनी मोदी सरकार राफेलची जेपीसी चौकशीसाठी का तयार नाही? असा प्रश्न उपस्थित केला आहे.
राफेल प्रकरणी मोदी सरकार JPC च्या चौकशीला का तयार नाही? असा प्रश्न राहुल गांधींनी ट्ववीट केला. या ट्वीटमध्ये राहुल गांधी यांनी उत्तरासाठी चार पर्याय दिले आहेत. दोषी असल्याची भावना, मित्रांना वाचवण्यासाठी आणि JPC ला राज्यसभेची जागा नकोय आणि वरील सर्व पर्याय बरोबर आहेत, असं राहुल गांधींनी ट्वीटमध्ये म्हटलं आहे.
राफेल लढाऊ विमान सौद्यात भ्रष्टाचार झाल्याचा आरोप राहुल गांधी हे गेल्या काही वर्षांपासून करत आहे. २०१९ च्या लोकसभा निडणुकीत राफेलमधील भ्रष्टाचारावरून राहुल गांधी यांनी केंद्रातील मोदी सरकारविरोधात ‘चौकीदार चोर है’ असा नारा दिला होता. पण त्यानंतरही निवडणुकीत काँग्रेसचा पराभव झाला.
राफेल विमान खरेदीच्या ५९ हजार कोटींच्या सौद्यात मोठ्या प्रमाणात भ्रष्टाचार आणि काही जणांना लाभ पोहोचवण्यात आला आहे, असा आरोप आहे. हे प्रकरण अतिशय संवेदनशील असल्याचं सांगत या प्रकरणी चौकशीसाठी फ्रान्समध्ये न्यायाधीशांची नेमणूक करण्यात आली आहे.
