भुसावळ (प्रतिनिधी) राष्ट्रीय स्वयंसेवक संघाचे सरसंघचालक मोहन भागवत यांचे मंगळवारी सायंकाळी ८.३० वाजता हटिया एक्स्प्रेसने भुसावळ रेल्वे स्थानकावर आगमन झाल्यानंतर ते सुरक्षा रक्षकांच्या प्रचंड गराड्यात धुळ्याकडे रवाना झाले.
धुळे शहरात १७ रोजी होणाऱ्या कार्यक्रमास ते हजेरी लावणार आहेत. राष्ट्रीय स्वयंसेवक संघाचे सरसंघचालक मोहन भागवत हे हटिया एक्स्प्रेसने येणार असल्याची माहिती कळताच पोलीस यंत्रणेने केला सायडिंग भागात मोठा बंदोबस्त वाढवला होता. मंगळवारी रात्री ८.३० वाजता हटिया एक्स्प्रेस स्थानकावर आल्यानंतर मोहन भागवत हे केला सायडिंग भागातून सुरक्षा रक्षकांच्या गराड्यातून चारचाकी वाहनांद्वारे धुळ्याकडे रवाना झाले. या वेळी स्थानिक पोलिसांसह झेड प्लस सुरक्षा कमांडो यांचा बंदोबस्त पुरवण्यात आला होता. सुरक्षा यंत्रणेत त्यांच्या गाड्यांच्या कॅन्व्हायमध्ये नेटवर्कीग जामरची गाडी, रुग्णवाहिका यांचाही समावेश होता. मोहन भागवत यांच्या धुळे दौऱ्याबाबत मात्र प्रचंड गोपनीय पाळण्यात आल्याचे दिसून आले.