जळगाव ( प्रतिनिधी ) – जळगाव महापालिकेच्या महापौर व उपमहापौर पदासाठी नामनिर्देशन पत्र भरण्यासाठी आज अंतिम मुदत असून त्या पार्शभूमिवर शिंदेसेनेचे मंत्री गुलाबराव पाटील, आ. चंद्रकांत सोनवणे, जिल्हा प्रमुख विष्णु भंगाळे तर, भाजपकडून आ. मंगेश चव्हाण, आ. राजुमामा भोळे, महानगर अध्यक्ष दिपक सुर्यवंशी यांची रविवारी दुपारी बैठक पार पडली. या बैठकीत महापौर पदासाठी तीन नावांवर व उपमहापौर पदासाठी तीन नावांवर चर्चा झाली. त्यापैकी भाजपचा एक सदस्य महापौर पदाचा अर्ज भरणार असून शिंदे सेनेचा एक जण उपमहापौर पदासाठी आज अर्ज भरणार असल्याचे ठरले. महापौर पदासाठी दिपमाला काळे यांचे नाव आघाडीवर असून उपमहापौर पदासाठी मनोज चौधरी यांचे नाव पुढे आहे.
महापालिकेच्या महापौर पदासाठी दिपमाला काळे, उज्वला बेंडाळे, वैशाली पाटील यांची नावे चर्चेत असून रविवारी झालेल्या बैठकीत देखील यासंदर्भात चर्चा झाली. परंतु बैठकीत शेवटपर्यंत कोणत्याही नावाबाबत एकमत झालेले नाही, आज दि.३ रोजी भाजप व शिवसेनेच्या सर्व नगरसेवकांची जी.एम. फाउंडेशनला बैठक बोलावण्यात आली आहे. या बैठकीत चर्चा करून महापौर व उप महापौर पदाच्या उमेदवारांचे नामनिर्देशन दाखल करण्यात येणार आहे. महापौर पदासाठी एकाचा तर उपमहापौर पदासाठी एका सदस्यांचा अर्ज भरण्यात येणार आहे. दोन्ही पक्षांनी समन्वयाने महापौर व उपमहापौर पद वाटून घेतले असून १०-१० महिने किंवा १- १ वर्षांचा फॉर्मूला ठरवायचा यावर देखील नगरसेवकांच्या बैठकीत चर्चा केली जाणार आहे. तसेच स्वीकृत सदस्य, स्थायी समिती सदस्यांच्या बाबतीत देखील चर्चा केली जाणार आहे.
दोन्ही पक्षांकडून एक-एकच अर्ज भरला जाणार असल्याचे दोन्ही पक्षांच्या पदाधिकाऱ्यांकडून सांगण्यात आल्यामुळे आज दि.२ सोमवार रोजीच महापौर व उपमहापौर पदाचे चित्र स्पष्ट होणार आहे. मात्र, औपचारीक घोषणा दि.६ रोजी आयोजित विशेष महासभेत निवड झाल्यानंतर केली जाणार आहे.
