मुंबई (वृत्तसंस्था) आर्यन खान ड्रग्स प्रकरणात एनसीबीचे अधिकारी समीर वानखेडे यांचे पाय खोलात गेल्याचे दिसतेय. आता एनसीबीच्या एका अधिकाऱ्याने पत्र पाठवलं असून ते अल्पसंख्याक मंत्री नवाब मलिक यांनी ट्विट केलंय. त्यामध्ये गृहमंत्री अमित शाह यांना सांगून महसूल विभागात काम करणारे समीर वानखेडे यांची अवैधपणे एनसीबीच्या झोनल डायरेक्टरपदी नियुक्ती करण्यात आल्याचा गंभीर आरोप करण्यात आला आहे.
एनसीबीच्या अज्ञात कर्मचाऱ्याने लिहिलेल्या पत्रामध्ये समीर वानखेडे यांच्या नियुक्तीबाबत उल्लेख करण्यात आला आहे. “सुशांत सिंह राजपूत प्रकरणात ड्रग्सची चौकशी एनसीबीकडे सोपविण्यात आली होती. त्यासाठी माजी अधिकारी राकेश अस्थाना यांनी एक एसआयटी स्थापन करून कमलप्रितसिंह मल्होत्रा यांना या समितीचे अध्यक्ष बनविण्यात आले. त्यानंतर गृहमंत्री अमित शाह यांना सांगून महसूल विभागात काम करणारे समीर वानखेडे यांची अवैधपणे एनसीबीच्या झोनल डायरेक्टरपदी नियुक्ती केली. त्यांना राकेश अस्थाना यांनी साम-दाम-दंड भेदाचा वापर करून बॉलीवूडच्या कलाकारांना अडकविण्याचे आदेश दिले. त्यासाठी बॉलीवूड कलाकारांना खोट्या प्रकरणांमध्ये अडकवून समीर वानखेडे आणि मल्होत्रा यांनी बॉलीवूड कलाकारांना करोडो रुपयांची मागणी केली. त्यापैकी काही हिस्सा हा राकेश अस्थाना यांना देखील जात होता. हे सर्व पैसे त्यांचे वकील अयाज खान यांनी गोळा करून दिला”, असे गंभीर आरोप या पत्रातून करण्यात आले आहे.
