मुंबई (वृत्तसंस्था) एनसीबीचे विभागीय संचालक समीर वानखेडे आणि राष्ट्रवादी काँग्रेसचे प्रवक्ते नवाब मलिक यांच्यातील आरोप-प्रत्यारोपांच्या फैरी गेल्या काही दिवसांपासून सुरू आहेत. आता नवाब मलिक यांच्याविरोधात एनसीबीचे विभागीय संचालक समीर वानखेडे यांचे वडील ज्ञानदेव कचरुजी वानखेडे यांनी मुंबई उच्च न्यायालयात मानहानीचा दावा दाखल केला आहे.
वानखेडे यांचे वकील अर्शद शेख म्हणाले की, “मलिक यांनी वानखेडे कुटुंबावर फसवणुकीचा आरोप करत त्यांच्या धार्मिक श्रद्धांवर प्रश्नचिन्ह उपस्थित केले आहे. ते हिंदू नसून मुस्लीम असल्याचंही मलिक यांनी म्हटलंय. वानखेडे कुटुंबातील प्रत्येक जण खोटारडा असल्याचा आरोप त्यांनी केलाय. ज्ञानदेव वानखेडे यांची मुलगी यास्मिन वकील असून ती प्रॅक्टीस करत आहे, ती फौजदारी वकील आहे आणि अंमली पदार्थांच्या प्रकरणांशी तिचा काहीच संबंध नाही, तिच्यावर देखील मलिक आरोप करत आहेत. मलिक यांनी वानखेडे कुटुंबातील सदस्यांचे नाव, चारित्र्य आणि त्यांच्या प्रतिष्ठेला नुकसान पोहोचवणारे आरोप केले आहेत,” असं दाखल करण्यात आलेल्या दाव्यात म्हटले आहे. वानखेडे कुटुंबांतील कोणत्याही सदस्याबद्दल प्रसारमाध्यमांमध्ये काही प्रकाशित करण्यात येऊ नये, त्यांच्याबद्दल लिहिण्यावर प्रतिबंध घालण्यात यावा, अशी मागणी ज्ञानदेव वानखेडे यांनी केली आहे.
