धरणगाव (प्रतिनिधी) तालुक्यातील आव्हाणी येथे सोनवद विभागाचे महसूल मंडळ अधिकारी लक्ष्मण बाविस्कर हे आपल्या पथकासह नेहमीप्रमाणे वाळू चोरी रोखण्यासंदर्भात कर्तव्यावर असताना त्यांच्यासोबत काही वळूमाफीयांनी दादागिरी केल्याचा धक्कादायक प्रकार समोर आला आहे. याप्रकरणी धरणगाव पोलिसात सात जणांविरुद्ध गुन्हा दाखल करण्यात आला आहे.
धरणगाव तालुक्यातील सोनवद विभागाचे मंडळ अधिकारी लक्ष्मीकांत बाविस्कर हे मंगळवार रोजी नेहमीप्रमाणे आपल्या पथकासोबत अवैध वाळू वाहतूक रोखण्यासाठी आव्हाणी ते बांभोरी प्र.चा असे गस्तीवर होते. यावेळी आव्हाणी शिवारातील गिरणा नदी पात्रात अक्षय पाटील, उज्वल पाटील, गणपत नन्नवरे, सोनू नन्नवरे, विशाल सपकाळे, किरण राजपूत आणि नाना पाटील हे अवैधरित्या वाळू वाहतूक करताना मिळून आले. यावेळी सर्वांनी मंडळ अधिकारी बाविस्कर यांच्यासह त्यांच्या पथकासोबत वाद घातला. तसेच शासकीय कामात अडथळा निर्माण केला. यानंतर महसूलच्या पथकाने गावातील सरपंच, पोलीस पाटील यांना देखील घटनास्थळी बोलवले. परंतु तरी देखील वाळू माफिया ऐकण्याचे मनस्थितीत नव्हते.
दरम्यान या सर्व गोंधळात एक वाळूने भरलेले ट्रॅक्टर पळवून नेण्यात एक जण यशस्वी झाला. तर महसूलच्या पथकाने सात ट्रॅक्टर ट्रॉलींसह साडेसहा ब्रास वाळू असा एकूण ७ लाख 16 हजाराचा ऐवज जप्त केला आहे. दरम्यान याप्रकरणी धरणगाव पोलिसात गुन्हा दाखल करण्यात आला असून पुढील तपास पोलीस निरीक्षक पवन दिसले यांचे मार्गदर्शनाखाली कर्मचारी करीत आहे.
