जळगाव (प्रतिनिधी) विमा कामासाठी एका ग्राहकाकडून 30 हजार रुपये घेतल्याचा आणि महिलेला अर्वाच्च भाषेत शिवीगाळ केल्याच्या आरोपाखाली नशिराबाद पोलिस स्टेशनमध्ये सरस्वती फोर्ड शोरूमच्या मालक आणि व्यवस्थापकाविरूद्ध विनयभंगाचा गुन्हा दाखल करण्यात आला आहे.
महिलेने दिलेल्या फिर्यादीत म्हटलेप्रमाणे, राष्ट्रीय महामार्ग क्रमांक ६ नशिराबाद रोडवरील सरस्वती फोर्ड शोरूमध्ये शहरातील ३४ वर्षीय महिला तेथे कामाला आहे. तेथे इन्शरन्सचे काम पाहतात. दरम्यान २५ ऑक्टोबर रोजी दुपारी २ वाजेच्या सुमारास शोरूमचे मालक मुकेश टेकवाणी आणि त्यांचा मुलगा धवल मुकेश टेकवाणी यांनी महिलेवर ग्राहकाकडून इन्शुरन्सच्या कामाकरीता ३० हजार रूपये घेतल्याचा खोटा आरोप केला. आरोप केल्याचा खुलासा करण्यासाठी शोरूमवर गेली असता मुकेश टेकवाणी आणि धवल टेकवाणी यांनी महिलेला पोलीसांचा धाक दाखवत लज्जा उत्पन्न होईल असे अश्लिल शिवीगाळ व धक्काबुक्की केली. तसेच पोलीसांचा धाक दाखवून माफिनामा लिहून, न घेतलेले ३० हजार रूपये वसुल केले.
याप्रकरणी महिलेने नाशिराबाद पोलीस ठाण्यात धाव घेतली. पिडीत महिलेच्या फिर्यादीवरून नशिराबाद पोलीस ठाण्यात शोरूमचे मालक मुकेश टेकवाणी आणि त्यांचा मुलगा धवल मुकेश टेकवाणी यांच्यावर विनयभंगचा गुन्हा दाखल करण्यात आला आहे. याप्रकरणी पुढील तपास पोलीस उपनिरीक्षक साळुंखे करीत आहे.
