सोलापूर (वृत्तसंस्था) कर्नाटकातील इंडीचे माजी आमदार रविकांत पाटील यांच्यासह २९ जणांना जुगार प्रकरणात अटक करण्यात आली आहे. या कारवाईनंतर सोलापुरात एकच खळबळ उडाली आहे. शहरातील होटगी रोड विमानतळ परिसरातील एका हॉटेलमध्ये जुगार अड्डा सुरू असल्याची माहिती मिळाल्यानंतर गुन्हे शाखेच्या पथकाने छापा टाकला असता या ठिकाणी अवैधरित्या जुगार सुरू असल्याचे आढळून आले.
होटगी रोडवर विमानतळाशेजारी माजी आमदार रविकांत पाटील यांच्या मालकीचे हॉटेल आहे. त्याठिकाणी जुगार अड्डा सुरू असल्याची माहिती गुन्हे शाखेच्या अधिकार्यांना मिळाली. त्यानुसार सहाय्यक पोलीस निरीक्षक नंदकिशोर साळुंखे व सहाय्यक पोलीस निरीक्षक उमेश महाडिक यांच्या पथकाने रात्री ११ च्या सुमारास हॉटेलवर छापा टाकला. त्यावेळी हॉटेलमध्ये पत्त्यांचा जुगार सुरू असल्याचे निदर्शनास आले. या छाप्यात पोलिसांनी हॉटेल मालक रविकांत पाटील यांच्यासह जुगार खेळणार्या तब्बल २९ जणांना ताब्यात घेतले. यावेळी जुगाराचे साहित्य आणि रोख रक्कम पोलिसांनी जप्त केली. त्यानंतर रविकांत पाटील यांच्यासह सर्वच जुगार्यांना विजापूर नाका पोलीस ठाण्यात आणण्यात आले. त्याठिकाणी मध्यरात्री उशिरापर्यंत गुन्हा दाखल करण्याचे काम सुरू होते. दरम्यान, रविकांत पाटील यांना ताब्यात घेतल्याचं समजताच त्यांच्या समर्थकांनी विजापूर नाका पोलीस ठाण्यात मोठी गर्दी केली होती.
