अमळनेर (प्रतिनिधी) तालुक्याच्या डांगर शिवारातील पेट्रोल पंपावर बंदूकीच्या धाकावर ३६ हजाराची लुट करण्यात आल्याची खळबळजनक घटना गुरुवारी मध्यरात्री घडली आहे. लुटीचा संपूर्ण थरार सीसीटीव्हीमधे कैद झालाय. पेट्रोलपंपावरील कर्मचारी नरेंद्र सोनसिंग पवार याच्याकडून १३ हजार तर किशोर रवींद्र पाटील यांच्याकडून १४ हजार व डिझेल टाकण्यासाठी आलेल्या संजय दिलीप भामरे याच्याकडून ९ हजार असा एकूण ३६ हजार ५०० रुपये लुटून चोरट्याने पोबारा केला.
डांगर शिवारातील पांडुरंग पेट्रोलपंपावर गुरुवारी रात्री सव्वाबारा वाजेच्या सुमारास काळ्या रंगाच्या रुमालाने चेहरा बांधलेला एक जण आला. त्याने पंपावरील कर्मचाऱ्यांना झोपेतून उठवत त्यांना बंदुकीचा धाक दाखवत पेट्रोल- डिझेल विक्रीचे पैसे हिसकावून घेतले. धक्कादायक म्हणजे त्याचवेळी एक जण चारचाकी घेऊन पेट्रोल भरण्यासाठी पंपावर आला. या लुटारूने त्याच्या त्या वाहनाच्या डीकीला लाथा मारून चालकास बाहेर निघण्यास भाग पाडले. त्यालाही बंदुकीचा धाक दाखवत मारहाण केली व त्याच्याजवळ असलेले पाकीट हिसकावले. यानंतर त्याचा साथीदार मोटरसायकल घेऊन आला आणि दोघे मोटरसायकलने धुळ्याकडे पसार झाले.याबाबत नरेंद्र सोनसिंग पवार (रा. रणाइचे, ता. अमळनेर) याने अमळनेर पोलिसात दिलेल्या फिर्यादीवरून अज्ञात दोन जणांविरुद्ध गुन्हा दाखल करण्यात आला आहे. पुढील तपास पोलिस उपनिरीक्षक विकास शिरोळे करीत आहेत. दरम्यान, घटनास्थळी पोलिस अधीक्षक एम. राजकुमार, अपर पोलिस अधीक्षक रमेश चोपडे, डीवायएसपी राकेश जाधव, पोलिस निरीक्षक विजय शिंदे यांनी भेट दिली. तसेच तपासासाठी स्वतंत्र यंत्रणा नियुक्त करण्यात आली आहे.
