अमरावती (प्रतिनिधी) मुलाच्या औषधीसाठी घराबाहेर पडलेल्या महिलेला लिफ्ट देणाऱ्या चारचाकी वाहनचालकानेच तिच्यावर अत्याचार केला. ही घटना शुक्रवार, ७ जुलै रोजी रात्रीच्या सुमारास घडली. दरम्यान, महिलेने आरडाओरड केल्याने ग्रामस्थांनी त्या वाहनचालकाला चांगलेच बदडून काढले. गोपाल पंजाबराव झिंगळे (३५, रा. खारतळेगाव) असे संशयित आरोपीचे नाव आहे.
७ जुलै रोजी रात्री ८ च्या सुमारास मुलाचे पोट दुखत असल्याने एक महिला मेडिकल स्टोअरवर औषध आणायला जात होती. त्यावेळी एक कार तिच्या मागून आली. वाहनचालक गोपालने तिची चौकशी केली आणि मेडिकल स्टोअरवर सोडून देण्याच्या नावाखाली पिडीतेला कारमध्ये बसण्यास संगीतले. पाऊस सुरू असल्याने पिडीता कारमध्ये बसली. यानंतर गावातील मेडिकल दिशेने वाहन नेण्याऐवजी तो दर्यापूरकडे निघाला.
पिडीतेने घाबरून गोपाळला जाब विचारताच वाहन थांबवून तो मागच्या सीटवर आला व महिलेचा विनयभंग केला. एवढेच नव्हे तर जबरदस्तीने वाहन एका शेतात नेऊन तिथे वाहनातच तिच्यावर अतिप्रसंग केला. त्यानंतर सदर महिलेने आरडाओरड करताच गावातील काही ग्रामस्थ तिथे आले. त्यांनी वाहनातून महिलेला बाहेर काढून गोपाळला बदडून काढले व पोलिसांना माहिती दिली. त्यानंतर महिलेचा पतीही तिथे आला. त्यांच्या तक्रारीनुसार पोलिसांनी गोपाळविरूद्ध बलात्काराचा गुन्हा दाखल करण्यात आला आहे.
