अकोला (वृत्तसंस्था) अकोला-पूर्णा सुपरफास्ट पॅसेंजर रेल्वे आणि अकोल्याच्या भाजपच्या खासदाराचे घर बॉम्बने उडवण्याची धमकी देण्यात आल्याची माहिती मुंबईच्या पोलीस नियंत्रण कक्षाने अकोला पोलिसांना दिल्यानंतर एकच खळबळ उडाली होती.
अकोला-पूर्णा सुपरफास्ट पॅसेंजरमध्ये बॉम्ब ठेवल्याचा फोन येताच, अकोला पोलीस दलात प्रचंड खळबळ उडाली. रेल्वे पोलिसांसह अकोला पोलिसांनी मंगळवारी रात्री १० वाजून ४० मिनिट पर्यत संपूर्ण रेल्वेसह रेल्वेतील प्रवाशांची देखील तपासणी केली. तर दुसरीकडे खासदारांच्या निवासस्थानी बंदोबस्त वाढविण्यात आला. २६ जुलैला अकोला रेल्वे पोलिसांना अकोला-पूर्णा सुपरफास्ट पॅसेंजर (रेल्वे क्रमांक १७६८३) या रेल्वेत बॉम्ब ठेवल्याचा आणि अकोल्याचे भाजपचे खासदार यांचे निवासस्थान बॉम्ब उडवून देण्याची धमकीचा फोन आला. त्यानंतर अकोला पोलिसांचे स्थानिक गुन्हे शाखेचे पथक, विशेष पथक, श्वान पथक, बॉम्ब पथक, जीआरपी, आरपीएफ, एससीआर पथकासह वरिष्ठ पोलीस अधिकाऱ्यांनी आणि कर्मचाऱ्यांनी अकोला रेल्वे स्थानकावर पोहोचले. त्यानंतर रेल्वे स्थानकावरून प्लॅटफॉर्म क्रमांक पाचवर उभी असलेली अकोला-पूर्णा सुपरफास्ट पॅसेंजरची तपासणी करण्यात आली.
या दरम्यान, रेल्वेच्या प्रवाशांची कसून चौकशीसह तपासणी झाली. या दरम्यान रेल्वेमध्ये बसलेल्या प्रवाशांचे फोटो काढण्यात आले. झडती दरम्यान डब्यांमध्ये कोणतीही संशयास्पद वस्तू, संशयास्पद व्यक्ती आढळून आली नाही, त्यानंतर रेल्वे आपल्या मार्गाने रवाना झाली. दुसरीकडे अकोल्याचे भाजपचे खासदार यांच्या घराशेजारील परिसराची तपासणी झाली. सध्या त्यांच्या निवासस्थानी पोलीस बंदोबस वाढवण्यात आला असल्याची माहिती आहे. तर रेल्वे पोलिसांनीही त्यांच्या निवासस्थानी भेटी दिल्या. आता अकोला-पूर्णा सुपरफास्ट पॅसेंजर रेल्वेमध्ये बॉम्ब अन् खासदारांचं घर उडून देण्यात येईल, या संदर्भात कुणी फोनवर माहीती दिली अन् फोन कुठून आला. याचा तपासही पोलीस करीत आहे.
