चाळीसगाव (प्रतिनिधी) तालुक्यातील कन्नड महामार्ग क्र. 211 वरील घाटाच्या पायथ्याजवळ अज्ञात महिलेचा खून झाल्याचे उघडकीस आल्यानंतर प्रचंड खळबळ उडाली आहे. धक्कादायक म्हणजे एका गोणपाटात खून झालेल्या महिलेची फक्त हाडं मिळून आलीत. या प्रकरणी चाळीसगाव ग्रामीण पोलिस स्टेशनला खूनाचा गुन्हा दाखल करण्यात आला आहे.
चाळीसगाव कन्नड महामार्ग क्र. 211 वरील घाटाच्या पायथ्याजवळ असलेल्या दर्ग्यापासून अंदाजे दोनशे मीटर अंतरावर पुर्व दिशेला बोढरे गावाच्या शिवारातील वन क्षेत्रातील झाडाझुडूपात मृतदेहाची हाडे मिळून आली आहेत. वन विभागाचे वनपाल दिपक किसन जाधव यांनी या घटनेप्रकरणी चाळीसगाव ग्रामीण पोलिस स्टेशनला दिलेल्या फिर्यादीनुसार अज्ञात इसमाविरुद्ध खूनाचा गुन्हा दाखल करण्यात आला आहे. 12 मार्च 2023 च्या साधारण दोन ते तिन महिन्यापुर्वी हा गुन्हा घडल्याचा अंदाज आहे. पुढील तपास पोलीस निरीक्षक ज्ञानेश्वर जाधव हे करीत आहेत.
