नाशिक (वृत्तसंस्था) नाशिकमध्ये घरात घुसून रिक्षाचालकाकडून दोन बहिणींना जिवंत जाळण्याचा प्रयत्न करण्यात आल्याची खळबळजनक घटना घडली आहे. दोन्ही बहिणींची प्रकृती चिंताजनक आहे. तर सुदैवाने या घटनेत एक वयोवृद्ध आणि दोन लहान मुले बचावली, मात्र घरातील संपूर्ण वस्तू जळून खाक झाल्या आहेत.
शिंदे नगर परिसरातील भाविक या इमारतीमधील एका फ्लॅटमध्ये प्रदीप ओमप्रकाश गौड (वय ३९) हे आई, वडील, पत्नी, भाऊ, भावजयी, मुले आणि पुतण्यासह एकूण दहा जण राहतात. मंगळवारी सकाळी त्यांच्या घरी त्यांच्या मावशी भारती गौड या आल्या होत्या. त्यांनतर बाराच्या सुमारास त्यांच्या परिचयातील रिक्षाचालक सुखदेव गुलाब माचेवाल उर्फ कुमावत (वय ५२, रा. कुमावत नगर) हा आपल्या हातात दोन पेट्रोलच्या बाटल्या घेऊन घरी आला. त्याने घरात असलेल्या भारती गौड यांना शिवीगाळ व मारहाण करण्यास सुरुवात केली. त्यानंतर सोबत आणलेल्या बाटल्यांमधील पेट्रोल घरात फेकायला सुरुवात केली. अचानकपणे घराला आग लावून देत तो फरार झाला. घरामध्ये प्रदीप गौड यांची आई सुशीला गौड (वय ६५), आजोबा जानकीदास गौड (वय ८५), पार्थ गौड (वय १५), चिराग गौड (वय ३), मावशी भारती गौड (वय ५५) हे होते. घरात झालेल्या भांडणाचा आवाज आणि घराला लागलेली आग पाहून पंधरा वर्षीय पार्थने बेडरूमचा दरवाजा लावून घेत आपल्या वडिलांना आणि आईला फोन लावून घटनेची माहिती दिली.
या आगीच्या घटनेमध्ये सुशीला गौड आणि भारती गौड या दोन्ही बहिणी गंभीररित्या भाजल्या आहेत. घराला लागलेली आग बघून आजूबाजूच्या लोकांनी अग्निशमन दलाला आणि पोलिसांना फोन करून माहिती दिली. तसेच, आजूबाजूच्या घरातून पाणी आणून आगीवर नियंत्रण मिळविले. ही आग इतकी भयानक होती की, घरातील सर्वच वस्तू जळाल्या.
दरम्यान, या घटनेनंतर आरोपी सुखदेव कुमावत याला पंचवटी पोलिसांनी अटक केली आहे. त्याच्यावर जीवे मारण्याच्या प्रयत्नाखाली गुन्हा दाखल करण्यात आला आहे.
