भुसावळ (प्रतिनिधी) शहरापासून जवळच असलेल्या अकलूद येथील पोदार इंटरनॅशनल स्कूलमधील नवव्या वर्गात शिक्षण घेणार्या विद्यार्थ्याकडे गावठी कट्टा आढळून आल्यानंतर शाळेत प्रचंड खळबळ उडाली. ही घटना शुक्रवार, 14 रोजी सकाळी 10.30 वाजेच्या सुमारास उघडकीस आली.
भुसावळातील एका भागातील रहिवासी असलेल्या कर्मचार्याचा मुलगा अकलूदजवळील पोदार इंटरनॅशनल या नामांकित शाळेत नववीच्या वर्गात शिक्षण घेतो. शुक्रवारी नेहमीप्रमाणे सकाळी शाळा भरल्यानंतर शिक्षकांनी विद्यार्थ्यांच्या दप्तराची तपासणी करायला सुरुवात केली. या तपासणीत नववीच्या एका विद्यार्थ्याकडे गावठी कट्टा आढळल्यानंतर शिक्षकांनाही घाम फुटला.
शाळा प्रशासनाला ही बाब कळवल्यानंतर फैजपूर पोलिसांना माहिती देण्यात आली. त्यानंतर फैजपूर पोलिसांनी संशयित विद्यार्थ्यास ताब्यात घेण्यात आले असून त्याच्याविरोधात फैजपूर पोलिसात गुन्हा दाखल करण्यात आला आहे. अत्यंत प्रतिष्ठीत शाळेतील विद्यार्थ्याकडेच गावठी कट्टा आढळून आल्यामुळे विद्यार्थ्याने हा कट्टा कुठून आणला त्याला हा कट्टा कोणी व का दिला?, या सारखे अनेक अनेक प्रश्न निर्माण झाले आहेत. दरम्यान, फैजपूर पोलिसांकडून तपास सुरू केला असून सदर गुन्ह्याचा तपास फैजपूर पोलीस स्टेशनचे सहाय्यक पोलीस निरीक्षक निलेश वाघ यांच्या मार्गदर्शनाखाली हेडकॉन्स्टेबल प्रभाकर नारायण चौधरी हे करीत आहे.
