पाळधी, ता.धरणगाव (1 जानेवारी 2025) ः सरत्या वर्षाच्या अखेरीला पाळधीत दोन गटात किरकोळ वादातून उसळलेल्या दंगलीनंतर प्रशासनाने येथे संचारबंदी लावली आहे. परिणामी नववर्षाच्या सुरूवातीलाच जनजीवन विस्कळीत झाले आहे. दरम्यान, पोलिसांनी आतापर्यंत सात आरोपींना दंगलप्रकरणी अटक केली आहे तर 11 दुकानांसह चार चारचाकी वाहने जळाल्याने अंदाजे 63 लाख 28 हजार रुपयांचे नुकसान झाल्याने स्वतंत्र गुन्हा दाखल करण्यात आला.
काय घडले नेमके ?
पाळधी गावात मंगळवारी 31 डिसेंबर रोजी रात्री सव्वा अकरा वाजेच्या सुमारास वाहनाचा कट लागल्यावरून वाद निर्माण झाला होता. या वादातून गावातील 20 ते 25 जणांच्या अज्ञात जमावाने दगडफेक करून रस्त्यावरील बंद असलेले दुकानांना आणि रस्त्यावरील चार वाहनांना पेटवून दिल्याने गावात तणावाचे वातावरण निर्माण झाले.
आगीमुळे व्यावसायीक उघड्यावर
जाळपोळ आणि दगडफेकीत अनेकांचे मोठे नुकसान झाले आहे. यात यासीर अमित देशमुख यांचे मोबाईल दुकानात दीड लाखांचे मोबाईल चोरून नेले, जावेद पथरू पिंजारी यांचे चप्पल दुकानाला आग लागल्याने आठ लाखांचे नुकसान झाले. शेख हबीब शेख शरीफ यांचे पानसेंटरला आग लावून 2 लाख 30 हजार रुपयांचे नुकसान केले, वकार अहमद शेख शकील यांच्या घरासमोरील दोन दुचाकी आणि घरांवर दगडफेक करून पाच हजार रुपयांचे नुकसान केले. फारुक शेख शरीफ यांचे बाजार पट्ट्यातील इलेक्ट्रिक दुकानाला आग लावून अंदाजे पाच लाख रुपयांचे नुकसान झाले आहे. एजाज युसूफ देशमुख यांच्या मक्का शॉपिंग कॉम्प्लेक्स मधील ऑटो पार्ट्स दुकान फोडून 3 लाख रुपयांचे सामान चोरून नेला. दानिश शेख सत्तार यांच्या रेफ्रिजरेटर दुकानाचे 10 लाखांचे नुकसान झाले. शेख साबीर शेख सादिक यांच्या मोबाईल शॉप दुकानाचे शटर तोडून नवीन मोबाईल व एलसीडी यांची तोडफोड करून दोन लाखांचे नुकसान झाले. अक्रम खान अन्वर खान यांचे दुकान फोडून 40 हजार रुपये किमतीचे अंड्यांचे नुकसान केले. रफिक खान अन्वर खान यांच्या आमलेट सेंटर हातगाडीचे नुकसान करत तीन हजार रुपयांचे नुकसान झाले. राष्ट्रीय महामार्गाच्या बोगद्याजवळ शेख तसव्वर शेख हमीद यांचे मालकीचे सॅन्ट्रो, टाटा, झेनॉन पोलो आणि मालवाहतूक पिकअप वाहन अशी चार वाहने भेटून सुमारे 10 लाख रुपयांचे नुकसान केले. सर्वमिळून अंदाजे 63 लाख 28 हजार रुपयांचे नुकसान झाल्याचे समोर आले आहे.
अज्ञाताविरोधात गुन्हा दाखल
याप्रकरणी जावेद पथरू पिंजारी (40, रा.बागवान मोहल्ला, पाळधी ता.धरणगाव) यांनी दिलेल्या फिर्यादीवरून पाळधी पोलीस ठाण्यात अनोळखी 20 ते 25 जणांविरोधात दंगलीसह तोडफोड आणि आग लावल्याप्रकरणी गुन्हा दाखल करण्यात आला. तपास पोलीस निरीक्षक पवनकुमार देसले हे करीत आहे.
