नवी दिल्ली (वृत्तसंस्था) शिवसेनेच्या १२ खासदारांच्या समर्थनानंतर संसदेतील शिवसेनेचं कार्यालय ताब्यात घेण्याच्या हालचाली मुख्यमंत्री एकनाथ शिंदे यांनी सुरु केल्या आहेत. शिंदे गटाने लोकसभा अध्यक्ष ओम बिर्ला यांना एक पत्र लिहिलंय. यामध्ये आमच्याकडे दोन तृतीयांशपेक्षा अधिक बहुमत असल्याचं सांगत शिंदे गटाने संसदेतील सेना कार्यालयावर दावा सांगितला आहे.
संसदेमध्ये प्रत्येक पक्षाला एक कार्यालय देण्यात येतं. तसंच शिवसेनेलाही संसदेत कार्यालय देण्यात आलं आहे. शिंदे गटाने आता हे कार्यालय आपल्याला मिळावं अशी मागणी शिंदे गटाने केली आहे. लोकसभा अध्यक्ष आधीचे गटनेचे विनायक राऊत यांनाच कायम ठेवतात की नवे गटनेते राहुल शेवाळे यांना मान्यता देतात यावर बरंच काही ठरणार आहे. जर शिंदे गटाचे राहुल शेवाळे यांना गटनेतेपदी मान्यता मिळाली तर शिवसेनेचे हे कार्यालयही शिंदे गटाच्या ताब्यात जाण्याची शक्यता आहे.
खासदारांचे बंड झाले फेल?
बंडखोर खासदारांनी आज लोकसभा अध्यक्ष ओम बिर्ला यांची भेट घेतली. त्यानंतर शिंदे गटाने लोकसभा सचिवालयाला पत्रही पाठवले. पण या पत्रात लोकसभा सचिवालयाने काही बदल सुचवले. मुख्य प्रतोद यांच्या नावानेच पत्र द्या असं शिंदे गटाला सांगण्यात आलं आहे. त्यामुळे लवकर पत्र मिळेल अशी आशा कमी झाली आहे. दरम्यान, शिवसेना नेते संजय राऊत यांच्या वतीने भावना गवळी यांच्या जागेवर राजन विचारे यांची पक्षाचे मुख्य प्रतोद म्हणून नियुक्ती करावी असे पत्र दिले होते. सुप्रीम कोर्टात सद्या शिवसेना आणि शिंदे गटामध्ये सुनावणी सुरू आहे. त्यामुळे लोकसभा सचिवालय जो पर्यंत कोर्टाचा निर्णय येत नाही तोपर्यंत निर्णय घेणार नाही. आगामी पावसाळी अधिवशेनात शिवसेना मुख्य प्रतोद कोण असेल यावर अजूनही कुठलाही निर्णय झालेला नाही.
