नवी दिल्ली (वृत्तसंस्था) पंजाब विधानसभा निवडणुकीत (Punjab Assembly elections) प्रचंड बहुमताने विजयी झाल्यानंतर आम आदमी पार्टीने (AAP) राज्यसभा निवडणुकीची तयारी सुरू केली आहे. या जागांवर भारताचा माजी क्रिकेटपटू हरभजन सिंह, आयआयटी दिल्लीचे प्राध्यापक संदीप पाठक, पंजाबचे आपचे सह-प्रभारी राघव चढ्ढा, लव्हली प्रोफेशनल युनिव्हर्सिटीचे कुलपती अशोक मित्तल आणि कृष्णा प्राण ब्रेस्ट कॅन्सर केअर चॅरिटेबल ट्रस्टचे संस्थापक संजीव अरोरा यांच्या नावाची घोषणा केलीय.
आपनं जाहीर केलेले उमेदवार राज्यातील नाहीत. ही पंजाबसाठी अत्यंत दु:खद बातमी – सुखपाल खैरा
दरम्यान, ‘आप’नं आपल्या उमेदवारांची नावे जाहीर केल्यानंतर विरोधकांनी त्यांच्यावर टीकेची झोड उठवली जात आहेत. आपनं पंजाबबाहेरील लोकांना उमेदवारी दिली आहे. राज्याबाहेरील लोकांना द्यायला नको होती, अंस विरोधकांचं म्हणणं आहे. काँग्रेस नेते सुखपाल खैरा यांनी एक ट्विट शेअर करताना म्हटले आहे की, राज्यसभेसाठी उमेदवार बाहेरील राज्यातील नसावा. परंतु, आपनं जाहीर केलेले उमेदवार आमच्या राज्यातील नाहीत. ही पंजाबसाठी अत्यंत दु:खद बातमी आहे.
परराज्यातील लोकांना उमेदवारी देणे, पंजाबशी भेदभाव आहे. कोणत्याही पंजाबबाहेरील व्यक्तीला राज्यसभेवर पाठवण्यास आमचा तीव्र विरोध असेल. दरम्यान, इतर राज्यातील लोकांना उमेदवारी देऊन आपनं पक्षासाठी दिवसरात्र झटलेल्या कार्यकर्त्यांची चेष्ठा केलीय. माझी भगवंत मान यांना विनंती आहे की, पोलिसांच्या अत्याचाराला बळी पडलेल्या बीबी खलरांसारख्या लोकांना राज्यसभा सदस्य बनवून त्यांचा सन्मान करा, असंही सुखपाल खैरा यांनी म्हटलंय.
