अलिबाग (वृत्तसंस्था) किरीट सोमय्या यांनी आज कोर्लई गाव गाठले आहे. सोमय्या हे ग्रामपंचायत कार्यालयाजवळ दाखल होताच शिवसेना कार्यकर्ते आक्रमक झाल्याचे पाहायला मिळाले. त्यानंतर भाजप (BJP) व शिवसेना (Shivsena) कार्यकर्ते आमनेसामने आले. दोन्ही बाजुंनी मोठी घोषणाबाजी झाली. ग्रामपंचायत परिसरात मोठ्या प्रमाणावर पोलीस दाखल आहेत. सोमय्या माघारी फिरताच ग्रामपंचायतीत काही अति उत्साही कार्यकर्त्यांनी गोमुत्र शिंपडले.
किरीट सोमय्या कोर्लई गावात पोहचातच त्यांच्याबरोबर असलेल्या भाजप कार्यकर्त्यांनी त्यांचा जयघोष सुरु केला. याला प्रत्युत्तर म्हणून शिवसैनिकांनी त्यांच्याविरोधात जोरदार घोषणाबाजी केली. भाजप आणि शिवसैनिकांमध्ये धक्काबुकीही झाली. त्यामुळे काही काळ वातावरण तणावपूर्ण बनलं होतं.
तणावपूर्ण परिस्थिती लक्षात घेऊन आधीच पोलिसांचा फौजफाटा तैनात करण्यात आला होता. पोलिसांनी कार्यकर्त्यांच्या हातातले झेंडे काढून घेतले. ग्रामपंचायतीला भेट दिल्यानंतर किरीट सोमय्या रेवदंडा पोलीस ठाण्यात गेले. त्यानतंर ते संध्याकाळी जिल्हाधिकाऱ्यांचीही भेट घेणार आहेत.
दरम्यान, किरीट सोमय्या यांनी कोर्लई ग्रामपंचयातीत काही कागदपत्रांची पाहणी केली. त्यानंतर किरीट सोमय्या ग्रामपंचायतीतून निघून गेले. किरीट सोमय्या ग्रामपंचायतीतून गेल्यानंतर शिवसैनिकांनी ग्रामपंचायतीत गोमु्त्र शिंपडलं. त्यानंतर शिवसैनिकांनी जल्लोष केला.
