पाटणा (वृत्तसंस्था) बिहारच्या शेखपुरा (Sheikhpura) जिल्ह्यातील बारबिघा पोलिस स्टेशन परिसरात ५ किशोरवयीन मुलांनी २ अल्पवयीन मुलींवर सामूहिक बलात्कार (Gang Rape) केल्याची धक्कादायक घटना उघडकीस आली आहे. एवढेच नाहीतर पीडित मुलींना सामुहिक बलात्कार केल्यानंतर 3 रुपये देऊन सदरील प्रकार कोणालाही न सांगण्यास सांगितले.
पोलिसांना घटनेची माहिती मिळताच छापेमारी करत दोन मुलांना ताब्यात घेतले आहे. तर चार मुले अजूनही फरार आहेत. हे सर्व सहा अल्पवयीन मुले बलात्कारापूर्वी मोबाईलमध्ये पॉर्न व्हिडिओ पाहत होते. त्यानंतर त्यांनी हे कृत्य केले आहे. बलात्कार करणाऱ्या सहा अल्पवयीन मुलांविरोधात सदरील घटनेतील पीडितेच्या आजीने पोलिस ठाण्यात गुन्हा दाखल केला आहे. पोलिसांनी सांगितले की, ‘सोमवारी संध्याकाळी हे सहा मित्र ५-६ वाजेदरम्यान एका ठिकाणी मोबाईलवर पॉर्न व्हिडिओ पाहत होते. त्यानंतर त्यांनी शेजारील गावातील दोन मुलींना धरुन आणले आणि सामुहिक बलात्कार केला. सर्व मुले अल्पवयीन असून, त्याचे वय १० ते १२ या वयोगटातील आहे. घटनेनंतर सोमवारी उशिरा रात्री पीडित मुलींच्या आजीने पोलिस तक्रार दिली आहे. सध्या दोन्ही पीडित मुलींना मेडिकलसाठी रुग्णालयात पाठवण्यात आले आहे. पोलिसांनी दोन मुलांना ताब्यात घेतले आहे.
दरम्यान, सामुहिक बलात्कार केल्यानंतर जेव्हा दोन्ही मुलींनी रडण्यास सुरुवात केली. तेव्हा आरोपी मुलांनी त्यांना तीन रुपये दिले. सदरील प्रकार कोणालाही न सांगण्याचे देखील आरोपी मुलांनी सांगितले होते. जेव्हा मुली घरी आल्या, तेव्हा त्या रडत होत्या. आजीने विचारल्यानंतर त्यांनी घडलेला प्रकार सांगितला.
