पाचोरा (प्रतिनिधी) ८० वर्षीय वृध्द महिलेचा अज्ञात व्यक्तीने गळ्यावर विळ्याने वार करत खून झाल्याची घटना पाचोरा तालुक्यातील पिंप्री बु. येथे घडली. याप्रकरणी पाचोरा (Pachora) पोलीस स्टेशनला खूनाचा गुन्हा दाखल करण्यात आला आहे.
पिंप्री (ता.पाचोरा) येथील रहिवासी तेजसबाई पुना जाधव या घरी एकट्याच असतात. ३१ मे रोजी सायंकाळी घराचे लाईट अद्याप का लागले नाहीत? यासाठी सदर माहिती गावातील नातेवाईक यांना कळविण्यात आली. यानंतर नातेवाईकांनी आत बघितले असता तेजसबाई यांच्या गळ्यावर विळ्याने वार करत खुन झाल्याचे समोर आले. याबाबत नगरदेवळा आऊटपोस्टला कळविण्यात आल्यानंतर नगरदेवळा आऊटपोस्टचे पोलीस कर्मचारी घटनास्थळी दाखल झाले. घटनाक्रम वरिष्ठांना कळविल्यानंतर पोलीस प्रशासनातील वरीष्ठ अधिकारी घटनास्थळी दाखल झाले
मंगळवारी (३१ मे) च्या सायंकाळी साडेपाच ते आठ वाजेच्या दरम्यान अज्ञात व्यक्तीने तेजसबाई यांच्या गळ्यावर विळ्याने वार करत खुन केला. यानंतर विळा तेथेच सोडत तेथून पोबारा केला. घटनास्थळी पोलीस उपअधीक्षक रमेश चोपडे, उपविभागीय अधिकारी भारत काकडे, गुन्हा शाखेचे पोलीस निरीक्षक किरणकुमार बकाले, पाचोरा पोलीस स्टेशनचे किसनराव पाटील यांच्यासह पथक दाखल झाले असुन तपासचक्र वेगाने फिरू लागली आहे.
