भुसावळ (प्रतिनिधी) वरणगाव शहरातील एका तरूणाशी परजिल्ह्यातील १६ वर्षीय अल्पवयीन मुलीचे लग्न लावून तिला गर्भवती करत नंतर गर्भपात केल्याचा धक्कादायक प्रकार समोर आला आहे. याप्रकरणी सोमवारी वरणगाव पोलीस ठाण्यात ५ जणांविरोधात गुन्हा दाखल करण्यात आला आहे.
वरणगाव शहरातील साधना नगरातील २८ वर्षीय तरुणाचे लग्न अकोला जिल्ह्यातील कपाशी येथील १६ वर्षीय अल्पवयीन मुली सोबत लावून दिले. त्यानंतर तिच्यावर अत्याचार करण्यात आला. या अत्याचारातून पीडित मुलगी गर्भवती राहिली मुलं आत्ताच नको म्हणून तिच्या सासू-सासरे, आई-वडिलांसह पतीने तिचा गर्भपात केला. हा धक्कादायक प्रकार १९ सप्टेंबर रोजी दुपारी ४ वाजता समोर आला. सोमवारी २३ सप्टेंबर रोजी सायंकाळी सात वाजता पीडित मुलीने वरणगाव पोलीस ठाण्यात तक्रार दिली आहे. त्यानुसार तिचे पती, आई-वडील, सासू-सासरे अशा ५ जणांविरोधात वरणगाव पोलीस ठाण्यात गुन्हा दाखल करण्यात आला आहे. या घटनेचा पुढील तपास पोउनि रामदास गांगुर्डे करीत आहे.
