जळगाव (प्रतिनिधी) आवडीचा स्वयंपाक केला नाही म्हणून मुलाने आपल्या जन्मदात्या वृद्ध बापाला मारहाण करत खून केल्याची खळबळजनक घटना जळगाव जिल्ह्यातील रावेर तालुक्यात असलेल्या पाल या दुर्गम गावात घडली. याप्रकरणी रावेर पोलिसांनी खुनाचा गुन्हा दाखल केला असून आरोपी मुलाला अटक करण्यात आली आहे. दिनेश उर्फ शिवा अनाज्या बारेला असे आरोपी मुलाचे नाव आहे .
यासंदर्भात अधिक असे की, गट नं. २७१ मध्ये मध्य प्रदेशातील शिरवेल- महादेव (जि. खारगोन) येथील अनाज्या भारत्या बारेला हे वृध्द दाम्पत्य पाल शिवारात वास्तव्यास आहेत. ते सुनेने सोडचिठ्ठी दिलेला मुलगा दिनेश उर्फ शिवा (वय २४) व त्याच्या तीन लहानग्या मुलांसह एका झोपडीत राहतात. आई गीताबाई हिचा हात फ्रेंक्चर झाल्याने वडील अनाज्या भारत्या बारेला (वय ७५) या वृद्ध बापाने चूल पेटवून दुपारी स्वयंपाक केला. त्यांनी मुलगा दिनेश उर्फ शिवा यास जेवण करून घेण्यास सांगितले, तेव्हा त्याने काय स्वयंपाक केला म्हणून बापाला विचारले. त्यावर बापाने उडदाच्या डाळीची भाजी व भाकरी केल्याचे सांगताच दिनेश चिडला. संतापाच्या भरात दिनेशने जन्मदात्या बापाला चापटा व बुक्क्यांनी मारहाण केली. शेजारीच असलेली बहीण बनाबाई ही धावत आली. दिनेशने तिलाही मारहाण केली, तशातच खाटेचा माचा डोक्यात घातला. त्यामुळे वृद्ध बापाचा जागीच मृत्यू झाला.
आरोपीला दोन दिवसांची पोलीस कोठडी
बनाबाई हिने दिलेल्या फिर्यादीवरून रावेर पोलिसांत आरोपी दिनेश उर्फ शिवाविरुद्ध भादंवि कलम ३०२, ३२३,५०४ अन्वये खुनाचा गुन्हा दाखल करण्यात आला असून आरोपी मुलाला अटक करण्यात आली आहे. आरोपी दिनेश उर्फ शिवा अनाज्या बारेला यास रावेर पोलिसांनी अटक केली. त्याच रावळ न्यायालयात हजर केले असता न्या. ए. एच. बाजाड यांनी दोन दिवसांची पोलीस कोठडी सुनावली आहे.
