नाशिक (वृत्तसंस्था) सासरच्या शारीरिक आणि मानसिक त्रासाला वैतागून सरपंच असलेल्या आपल्या बहिणीने विष प्राशन करुन आत्महत्या केल्याचा आरोप तिच्या भावाने केला आहे. भावाने दिलेल्या तक्रारीनंतर महिला सरपंचाच्या पतीसह सासरच्या तिघांना पोलिसांनी अटक केली आहे. ही धक्कादायक घटना काल रात्री घडली आहे.
नाशिक – निफाड तालुक्यातील मरळगोई खुर्द येथील महिला सरपंच योगिता अनिल फापाळे यांचा संशयास्पद मृत्यू झाला आहे. योगिता यांच्या भावाचा आरोप आहे, की त्यांची बहीण योगिता या सरपंच झाल्यापासून सासरचे लोक त्यांचा छळ करत होते. या त्रासाला कंटाळून त्यांनी राहत्या घरी विषारी औषध सेवन केल्याने त्यांचा मृत्यू झाला आहे.
मयत महिला सरपंच योगिता फापाळे यांचे भाऊ संतोष शांताराम गवळी यांनी दिलेल्या तक्रारीनंतर पोलिसांनी गुन्हा दाखल केला आहे. संतोष गवळी यांनी दिलेल्या तक्रारीत म्हटले आहे, की सरपंच झाल्या पासून माझ्या बहिणीचा तिच्या सासुरवाडीचे लोक छळ करत होते. माझ्या बहिणीचा कोणत्याही कारणावरून वारंवार मानसिक व शारीरिक छळ केला जात होता. योगिताने सासरच्या छळाला कंटाळून विषारी औषध सेवन करून आत्महत्या केल्याची तक्रार गवळी यांनी केली आहे. सासरे बाबासाहेब फापाळे, पती अनिल बाबासाहेब फापाळे, सासु सरला फापाळे आणि दीर प्रदीप फापाळे (सर्व रा. मरळगोई खुर्द) या चौघांविरुद्ध लासलगाव पोलीस ठाण्यात गुन्हा दाखल करण्यात आला असून पतीसह सासरच्या तिघांना पोलिसांनी अटक केली आहे.
