पुणे (वृत्तसंस्था) पुणे शहरातील आयबी गेस्ट हाऊसमध्ये महिला परिचारीकेचे आंघोळ करतानाचे फोटो आणि व्हिडीओ काढल्याचा धक्कादायक प्रकार समोर आला आहे. याप्रकरणी पोलिसांनी सुरक्षारक्षकाला अटक केली आहे. अशोक तुकाराम चव्हाण (वय 26, रा. आयबी गेस्ट हाऊस) असे अटक केलेल्या तरुणाचे नाव आहे.
एका 36 वर्षीय परिचारिका महिलेने बंडगार्डन पोलीस ठाण्यात फिर्याद दिली. त्यानुसार कोरोना ड्यूटी करून आल्यानंतर परिचारिका आंघोळ करण्यासाठी गेल्या. यावेळी ड्यूटीवर असलेल्या सुरक्षारक्षकाने त्यांच्या बाथरूमच्या खिडकीजवळ येत त्यांचे आंघोळ करतानाचे फोटो काढले. याप्रकरणी पीडित महिलेने बंडगार्डन पोलीस ठाण्यात तक्रार अर्ज केला होता. पोलिसांनी परिसरातील सीसीटीव्ही तपासले असता सुरक्षारक्षक तेथे आढळून आला.त्यानंतर बंडगार्डन पोलिसांनी गुन्हा दाखल करत सुरक्षारक्षकाला अटक केली आहे.
